收爐

轉眼間，到了年廿九，明天就係大年初一。成日想攪清潔衛生，當然又未做啦。

星期日休息，就掛住做我的簡易版盤菜。今次買左西蘭花、中蝦、雞肶、連埋豬皮、蘿蔔、腩肉，都幾大堆頭。掛住煮和食，就乜都冇做。

都有做野，就係睇電視。咁辛苦安裝好新魚骨天線，當然要睇返夠本，享受勞動成果啦。

年尾有好多野要準備。主要係柴米油鹽夠唔夠用，新年流流，冇米煮飯就唔好啦。查找不足，係廁紙有點存量低。雖則話超市日日都開，但比藥房賣得貴，要屙貴屎就唔抵勒。

早兩日同七仔阿姐傾開偈，就提到呢個問題。我話街市檔口過年多數唔開，開的都賣貴幾成。阿姐就一輪嘴教訓我，人地過年都開工，就由得人賺啦，一年一次，賺得你幾多？開開心心，畀多少少錢，免得煩惱，又有乜所謂。你唔通一早買定晒咩，擺到初三，正菜都變霉菜啦。

阿姐又有道理喎。想想下，呢個係我老媽子的做法，一早買定晒，打爆個雪櫃，但係就真係好多野都見到都唔開胃。我好學唔學，學埋呢D野，成日覺得唔抵唔抵，真係笨實，人生難得心情舒暢，係要攪到心掛掛，有乜謂呢。

人地講乜鬼貧乏思想，就係呢種。怪唔得窮左大半世。所以都唔理咁多，一切照常咁做，要買就買。大不了走去便利店買飯盒叮熱佢，坐響公園食，掉埋垃圾先返屋企。

年初二，或者去買舊魚來開年，食落肚的，自己享受，唔好想咁多了。