我命由我不由天

哪吒當紅，連呢句話都紅起來。其實在電影出現之前，呢句話最常見於了凡四訓，袁了凡教人行善改命。

其實呢句話有幾真呢？我識人唔多，接觸人都不多，但係過去一年，接二連三，出現病患。最先係工作上阿頭，先係要通波仔，然後屎忽有事，痛到死去活來。

過年前就到食神老豆，已開始化療。早兩星期見到飛髮佬大頭文，好不尋常。之後和老同學聚會，驚聞另一老同，剛退休就做左搭橋手術。

到昨日，同事阿康話收工要去睇醫生。原來佢右眼睇野，該直既唔直。唉，黃斑有事啦。昨晚再問佢，真係如此，未知乾定濕，要十星期後再作詳細檢查。

你買層新樓，一個唔好彩，可以窗框滲水，再唔好彩，低層的話，屎渠一塞，乜野都湧晒出來。好彩的，十年廿年都冇事；住下住下，總會出現問題，去水唔順，天花剝落。。。人體都一樣，如今大家都用左六、七十年，出問題係必然，只差幾嚴重，出在那一個部位。

醫生問阿康有冇食煙，有丫。拿！係一個risk factor勒。我同阿康講，鄭丹瑞唔食煙，一鳩樣有黃斑問題丫。

係咪均衡飲食，適量運動，無不良嗜好，充足睡眠，就健康快樂呢？唔駛我講啦。萬般皆是命，半點不由人。

以前中學同學中的學霸，年年考第一，會考九科，八A一D，D係因為佢唔小心，答少一整版題目。近來聽聞佢在概嘆，後悔當年只知讀書，點解唔及時行樂呢？

我等頑劣學生，當年考試派成績表，有條友就話，我地掛住玩唔讀書，成績唔好，但係我地玩過呀，已經賺左啦。

台灣謎因講：高中唔努力，就要捱幾十年；但係高中努力，捱完大學四年，再捱多幾十年。

香港謎因講：唔返工就窮；返工就又攰又窮。

都係李白講得岩：

花間一壺酒，獨酌無相親。

舉杯邀明月，對影成三人2

月既不解飲，影徒隨我身。

暫伴月將4影，行樂須及春。

我歌月徘徊，我舞影零亂。

醒時同交歡，醉後各分散。

永結無情遊，相期邈雲漢。