不過，呢幾日，我都做左些少野。
就在前日，荃灣城門谷熱到卅七度，我就洗左個屎坑。點解洗屎坑？因為可以脫光光，淋濕個身咁來做，咁就冇咁熱啦！洗得屎坑咁厭惡性的工作，一件污兩件穢，就洗埋個灶頭。油漬一掃光，好有成就感。
另一樣，就係理髮。前日，行過一間樓上理髮店，睇下個價目牌，單剪只係四十？好平喎！地點就在我屋企附近。我未去加邦前的老家亦在附近。我懷疑我老媽子以前就在此理髮電髮。
自從大頭文走左，我流離失所，四圍去試，次次失望。所以好抗拒理髮。既然撞到呢間野，昨日就去試。
間野在二樓，上到去推門，古色古香得來尚算潔淨。理髮師係矮矮瘦瘦的老人，有一個客人正在理髮，另一個等緊。咁我就排下隊啦。牆壁係瓷磚鋪下半幅，咁你就知係七、八十年代的格局。
輪候期間，望住鏡中的自己。理髮店的鏡，係特別明亮特別清晰。我發覺鏡中的自己，頭髮斑白得來，灰濛濛，披頭散髮，怪唔知得我咁兜茂。就連臉色，都好似灰暗黝黑，沒半點神采。
等左差不多三十分鐘，又有兩個客人來排隊，才輪到我。
師傅話：你第一次來喎！
我：係呀！
師傅：你一入門口，我一眼就睇出，你未來過啦。把頭髮好似頂帽咁笠住個頭。
我：之前個師傅退左休。我呢一年兜兜轉轉，試過好多舖頭，都係唔理想。
師傅：我地有技巧，剪出來係有層次既。。。
下刪七千字自吹自擂。
簡而言之，佢係福州人，開左四十年，今年七十幾歲，朝朝晨運行一萬七千步。
理髮的結果、我係滿意的。以後就鎖定你做我理髮師。
不過，我好擔心，你咁撚老，我好快又要再搵過個師傅。
沒有留言:
發佈留言