功德無量

昨日呀～～真係做到我仆街。

不過好有滿足感。

每間屋最初，都係家徒四壁。慢慢加下一件、加下一件，先會變得亂糟糟。呢個狗窩，住左廿年了，可想而知，有幾多雜物。廿年中的頭幾年，都會執拾下。過年會大掃除，記得有年仲髹過油漆添。回想返，我都唔敢相信。

執拾，無非都係將物件入箱，擺得整整齊齊，咁就覺得窗明几淨，心安理得。阿彌陀佛。

但係久而久之，又多幾個箱。有D箱係日本城買，有D係姨媽傢俬，再後來，就淘寶買。即係箱到九個花款，不同呎吋。咁就放埋一齊都覺得凌亂。又攪下攪下，根本都唔知箱入邊有乜了。有時，你記得有件乜乜物物，但係唔記得放在哪個箱。一想到要翻箱倒籠，算啦！買過啦。當然更有時係連自己都唔記得有件咁既野。都幾好架，摷摷下發覺原來有件野合用，好似中頭獎咁架。

昨日，我就係掀開幾個大膠箱，將入邊的物件逐件取出，粗略分類，等下一步從新分箱。

做完呢個動作，我就拉開兩個架，將架後邊的地方用地拖、拖到乾乾淨淨。呢D牆邊的陰濕位，長年不見天日，不需我形容，大家都知幾咁核突。來來回回，拖完、過完水又再拖，重覆好幾次，先至拖得乾淨。現在望見，都喜從中來。

好啦！現在去休息一下，下午再來。