五十年聚

今晚去左一班老同學的聚會。之前想攪個麻雀王大賽，有條友臨時放飛機，只剩返一枱麻雀。我一番心血付諸流水，好撚慶，想唔去。回心一想，人地或者真係有事呢，寛容下啦。

早十五分鐘前就去到現場，WHATSAPP問大家有人到未。一擰轉頭，有條友楝在我面前。定睛一看，原來係４號。喂！好耐冇見。心諗，嘩！你又老左，差D認你唔到。或者佢都係同一想法。幾乎同一時間，開枱的四人又到。阿６號來到面前，冇戴眼鏡。喂！你做乜？做左LASIK？佢話係呀，白內障丫嘛。鞋～大家遲早一樣啦～～～咁你都唔係第一個，１號早幾年就做左啦。佢話三萬蚊一隻眼。我問佢係咪買一送一。佢話吊你啦！兩隻眼六萬呀！

六個人到左，就入場啦。一坐低，２３號又到。唏唏唏，一輪嘻哈，就問返剛才雀情如何。２９號話，挑！一個輸三個囉。我話，其實你贏左友誼，為三個人帶來歡樂，贏了三個人的愛戴。跟住主場的１２號都到，佢同店主熟落，訂檯點菜都係佢。

只剩１號未到，咁當然就講佢是非。佢老婆係退休懲教員，鎖起佢啦！店舖係潮州菜，先上菜脯鹹菜花生等小碟。一到食野，個個六十過外，就提到膽固醇。１２號話驚超標，５號已經搭過橋，就曉以大義，膽固醇係自身製造出來，唔關你食乜野事。呢個時候１號都到，大家都要問責。

講開飲食健康，１號都大把疑惑，原來佢有胃酸倒流，仲食完飯唔落格。１２號原來又有類似情況，跟住佢地就交流好多藥名，仲話自己食左幾多幾多年。聽到我以為佢地係醫生。

１７號跟就就開始發問，問一些兀突問題。大家都習以為常。２９號話，蝦，佢打麻雀時唔係咁架喎，好正常架喎。１號話，係囉，上年我結婚，佢問我仲得唔得。

１７號突然又轉向佢右面的４號，問：你結左婚未？

我就同坐在我左邊的２３號講，１７號出招好奇特，真係唔知點拆。

好在一路上菜，大家得以轉下話題。嘩！鵝肝入口即溶呀。乜乜物物。。。

１２號忽然奇招突出，反問１７號，到底你做阿爺未？１７號話，都算做左架啦。

咁奇怪？原來佢個仔在台灣結婚，老婆買一送一。１７號話都同個仔講過，你想清楚喎。。。

我心諗，但冇講出口。你離左婚再聘，咪又係有個便宜仔。你個仔學足你囉。

＝＝＝

就係咁，過左兩個鐘，我飽到食唔落。真係滿載而歸。