觀察，收集數據，分析，推理，結論

連踩十三日，昨晚終於休息。日以繼夜咁訓，到今朝醒來，大約六點。落去飲個早茶。坐坐下有個後生仔來搭檯，只聽見茶博士阿姐用普通話和佢交談。又坐坐下，兩個推點心阿姐又圍埋來，你一句佢一句都係普通話。明明呢兩個阿姐唔係順德就係番禺，點解都要講唔咸唔淡普通話呢？

再望下個後生仔，白白淨，笑容燦爛，唔算得係令仔。但係足以令一眾大媽流口水了。只能夠講，大媽都愛小鮮肉。呢個可算係民間智慧，經過千百萬年的億萬人的觀察和統計所得的結果。

我呢個花甲老翁，因為年紀大，見過的人和事都唔少，對事物的判斷，都頗有心得。

就好似，廿四節氣，係經過中國農民數千年累積的經驗，而得出個名稱。乜野雨水，小雪，大雪。。都有其蘊含的意義。不過，中國咁撚大，黑龍江的大雪，和香港的大雪，就好唔一樣。經過幾十年的觀察，數據收集，和分析，加上我聰明無敵的頭腦去整理，我得出小小結論。

小滿，呢個節氣，在香港有乜意義呢？第一，呢日之後，沖涼就唔需要開熱水，水喉水就可以，唔會冷親，仲慳返D電費。

第二，呢一日之後，街市的豬肉佬就開始打大赤肋，唔著上衣。另外，成個街市，只有豬肉佬會唔著上衣；你幾時見過賣菜婆唔著上衣丫？

又，唔著上衣的麻甩佬，露出的兩點的其中一點，總係會有一條或以上的毛。永無例外。

你話：你都傻既，得閒無事數人有幾條毛。其實呢個係一種思維訓練，正所謂一理通、百理明。笨實先唔識轉膊，有左個技巧，就可以應用到其他方面。

例如：我正在為蠢人分類。根據我對中國語言的認識，其實聰明呢個形容詞，只係好低要求。聰明聰明，其實只係指耳聰目明，有耳可以聽，對眼睇得清楚，就已經叫聰明。唔聰明的人，你指埋佢睇，講埋佢聽，佢硬係都唔明白。不過呢類人有樣好，佢地係一定唔會幫你拗。

但有另一類蠢人，明明係黑，佢都話係白，最慘係佢係都要同你拗。最近就遇到一個。我話打風麻煩，一到九號波或以上，港鐵露天段就停駛。佢係都話有車照行，態度就似你都傻既咁。佢仲話美孚到茘景段係露天。大佬，荃灣線幾十年前一通車我就搭，我會唔知？但係佢就係當你白痴，死都話係露天。早兩日，佢又發作，話有颱風形成，係超級颱風，將會打到正香港和澳門。我話：你講白海豚？預告話吹向台灣喎。佢話：乜名我就唔知，總之就打正香港。呢類蠢人，故且叫做『總之』啦。總之佢就係一句總之，然後表現成懶得同你拗。

假以時日，我收集晒呢D資料，做好分類，就出本蠢人大全，一定可以造福人群。