醒來之時，天已全亮，睇下個鐘，原來已經八點。昨晚一篤夜尿都冇。睡得唔錯，但係口中有啖濃痰，馬上去廁所咳吐。感覺鼻塞塞，用力池～～～池～～～池～～～，左邊出到，右邊鼻孔出唔到。秋燥呀，只好繼續梳洗。
放假休息，今朝好好享受啦。去茶居飲早茶，叫阿姐普洱要濃D。食左個叉燒包，加一碟雞絲粉卷，埋單四十八。
頭髮係時候去剪一下勒。上到去，見到曾近榮在食早餐。我就話，你慢慢，我坐低等你。
條飛髮佬著西褲，短袖恤衫，戴個眼鏡，真係幾似曾近榮。佢老實不客氣，繼續食早餐。我見佢食緊粟米，真係好健康喎，邊有人早餐食塞米架。我除定老花鏡去等，但係坐下坐下，係剛才飲茶，定係昨晚食咖喱的效應呢？開始急了。
曾SIR突然起身，走向廁所，手中仍揸住半截粟米，大佬，你食粟米續粒食？咁耐仲未食完？出返來，又坐低繼續食。我腹中雷嗚，唔得勒。就起身走，講：人有三急，我返屋企一陣，轉頭來過。
曾蛇話：喂！就得喇，你話慢慢，我咪慢慢囉。做乜走呀。
我吊你老母啦：我轉頭返來呀。
返到屋企，嘩！好暢快，應該係咖喱的功效。
再返去飛髮舖，噢！已經有個大媽在剪髮。只好排隊慢慢等。剪完髮，曾蛇拎出一盒藥水，原來大媽係要電髮。今次仆街了，一篤屎，換來有排等。但係曾蛇真係利害，三兩下手勢就攪掂一頭的髮捲，一野罩上個太空人頭罩，就來招呼我。
第一句佢就問我：你第一次來？我心諗，你如果著件白袍，就真係似足逃學威龍中的曾SIR。 我話：上個月咪來過囉～～～跟住佢又問我佢係咪好快手、我話：係！冇得頂。上髮捲咁快，你算林把溫。
一邊剪佢一邊問：你今年五十幾？我話：吊你啦！我四十二咋。條友一係大炮無限，一係老眼昏花。我兩蚊搭車都幾年啦。
跟住佢就大刀闊斧，係咁剪係咁剪。仲話：我幫你依個頭形執返好！
蝦！上次你又唔執？但係，剪完又真係幾好喎。算你啦！
收貨啦～～～四十元，咁既手藝，物超所值啦。曾SIR有幾聲咳，我真係驚佢捱唔得幾耐，又要搵過個飛髮佬、咁我就頭都大勒。
飛完髮，當然要上城門水塘啦。上到去，心曠神怡，只係有點曬，我又著件黑衫，好撚熱。
如常行引水道，去到中途一個亭，坐下休息下，就原路折返。今日要去竹林禪院。
引水道有幾個出口，可以去老圍，可以去圓玄學院，仲有荃錦公路，和芙蓉山。就去芙蓉山。去到竹林禪院，直往地藏王菩薩處，為食神老豆唸三次南無阿彌陀佛。一場相識，從此陰陽相隔，希望你可以和食神重聚，再無病苦。
跟住落去美心MX，一點鐘，焗豬扒飯賣晒，問過幾點有貨，五點？我話今晚五點我就來。
返到屋企，坐下坐下，寫幾篇BLOG，就快五點。今晚一定要了結呢單野。
連踩十六日，終於休息，又係過冷河，有七日休漁期。
收左工，打算出街食個早餐，然後回家，繼續批灰。但係實在累，回到家中，摸下幅牆，早前批的灰，硬梆梆的，我的意志，遠不夠硬，咁就一切作罷。
休息嘛，咪應該好好休息囉。隊啤訓覺覺啦。
到黃昏時份，去美心MX換我的焗豬扒飯，得來一肚火。轉去英記茶莊買普洱，然後去荃豐的小雨天食左個咖喱牛腩飯。吊，五十四蚊，完全冇牛味。回家途中，望向如心，一彎新月，預告了中秋。
返到屋企，睇下跑馬。落注，輸；再落注，又輸；存入一百，輸到最後十雞，買一隻披屎，又輸。打算登出，點解結餘有廿一個半？查返紀錄，真係老到濛鳩查查，原來有一注我想買鐵三角位置Q，點知買左位置，中一隻、派廿一個半。
來到最後一場，有廿蚊，我爛賭，寧為玉碎，就買方仔隻睿盛人生溫披啦，有十倍，中左就反敗為勝！一開閘呀！各歸各位，睿盛人生阿奧爾民跟住個好位，又唔幫人搶頭，又唔落後，似模似樣啦～～～ 轉完彎，大家來傢伙勒，奧爾民係咁推係咁推，拎支鞭出來打兩野，咁就出頭勒。我條飛睇來收錢啦，開始笑到流口水之時，大外檔何澤堯條仆街騎隻極光之子如飛殺上，就咁劏左我匹馬！仆街！原本百幾蚊，只剩卅幾蚊披屎，埋單要輸六十幾元。
含恨地去訓覺～～～
