帶眼識人

之前講過，識個大炮友，慣性吹水作大，最大一單話要買千呎豪宅。你篤爆佢，佢就變得更精細，吹到你冇得挑剔，真係被佢吹漲。

其實個故仔尚有後著。當時係一大班酒肉朋友，得閒就飲飲食食，打邊爐、飲啤酒，吹下水咁。大伙兒見呢條大炮友當人白痴，仲愈來愈過份，自然逐漸疏遠佢。當中有一個M君，跟大炮友尚有來往，忽然走來問我地，點解出現當前情況。我就講：呢，家人、就冇得揀既，生出來就要接受，一世面對。朋友就唔同，係要揀既，而家要好嚴格咁揀。M君大力點頭，話：明白。

不久之後，M君向我地訴苦，話大炮友借左佢幾千銀，之後就失蹤。電話又唔聽，街上離遠望見就掉頭走。大家都無語。我私底下諗，呢條大炮友真係失敗，咁多人在場，冇一個肯為你講半句好話。可見你真係不堪。M君係專業人仕，年薪上百萬，碼頭充足，開名車，飲名酒，但就係欠缺大氣，斤斤計較。有次有人送我月餅劵，我一個人食到明年端午都食唔完啦，咁岩碰到，就送畀佢。佢多謝都冇聲就袋起。在群組中，我係最窮一個，有次M君當住大家面，無情白事，話你有需要的話就開聲，一萬幾千冇問題架。我話：一萬幾千咪睇少你？係就整廿皮啦。乍見攞威行動失敗，就立即笠水。

後來，又有其他人想搵我笨實。我就托辭我開始茹素，絕跡打邊爐行動。再也不見呢班人。

＝＝＝

咁大篇幅，就係想講，物以類聚，人以群分。你識左一班人，嘻嘻哈哈，飲飲食食，當然好易過。但係放長雙眼睇，可唔可以長期來往，就係睇呢一群人的特性。一群人中，十個中有一個仆街，唔好以為係佢特別衰，可能係你唔小心，其實成群都係仆街。走得遲，就連你都仆街。

＝＝＝

我朋友個女，係會考女狀員港姐的同學。我就話，呢條女黐埋個發瘟男友，好極有限。你睇佢老母，出本書我的女兒乜乜乜。大佬，你呢一家人食乜架？個女死左要出傳記？定係佢係乜野偉人，推翻暴政，抑或有重大貢獻？

放長雙眼睇，佢個發瘟前男友，趷今最有作為就係上擂台，真係出過力去搵錢。又睇下阿發瘟現任女友，佢歷史係點樣？

你身邊的人怎樣，你就係咁撚樣。

＝＝＝

剛出事的前新聞主播，本來人都死左，就由得佢安安樂樂地去啦。但係突然跑條柒頭出來，話要限時，要佢生前女友出來道歉，否則就爆大鑊。

前主播呀前主播，本來我對你的印象都比較中性，唔會話你好或壞，但係原來你識埋D唔三唔四的人，唉！怪得邊個丫？