雜崩冷

終於，２０２４年有好事發生了。

唔記得多久之前，我話要裝個電視機架，但係我係好怕用電鑽，一來怕隆隆聲，二來用力鑽時，反震力會震到個人好唔舒服。所以呀，拖左唔知幾耐。最近，我終於忍唔住，鑽左幾個窿，草草安裝好個架，托部電視上去，因為得我一雙手，又要托實部機，又要上螺絲，真係托到我抽筋。不過了左一件事，真係好有成就。

第二，廚房個抽氣扇，用了起碼廿年，呢類有摩打，有扇頁的東西，KDK真係冇得頂，不得不讚。但係，廚房油煙，日積月累，個摩打冇事，但係油漬積聚，運作起來就唔暢順。起初，只要噴WD４０就可以，但係只可以頂住幾個月，佢又試慢動作，甚至罷轉。摩打開著後唔轉，係會燒的，所以又形成心理負擔，每次開機，都要睇住佢轉先安樂。

我都知係乜原因，和有乜解決方法。上網查過，點樣去拆，點樣清理好承軸和啤令，然後上返雪油。。。上淘寶買定雪油，就打算開工。但係又係同一問題，油漬太厚，螺絲都扭唔開。呢D就叫積壓難返。唯有又勉強上WD４０，頂得幾耐得幾耐啦。到最近十二月一次寒潮，佢就凍到死直，手動都轉唔郁。我等天氣回暖，佢都只係慢動作應酬下我。如是者過了幾星期沒有抽氣扇的日子。早兩日，心諗，不如試下用哥士的開水，用個噴壺噴入去，希望可以溶化油漬。噴噴噴。。。開掣！咦！得喎！噴個不亦樂乎。。。

今早收工返來，凍到仆街，心諗，得定弗得，睇今朝勒。一開掣，佢老母，轉呀！原來咁簡單。白白浪費了許多WD４０添。有時，一定要對症下藥，但係下藥都有好多方法既。

第三，我成日話班營養師呃錢。好似奧米加３，佢地淨係識話來源係三文魚等多油魚類。咁鯇魚有冇呢？從來冇營養師講呢樣野。益生菌，哦！就食泡菜、納豆啦。。。

我地老人家，細個時，根本聽都未聽過泡菜納豆呢類野，咁廣東人咁多年來，從何吸收益生菌呢？講到益生菌咁重要，而家D補充劑，仲賣得咁撚貴，你班人讀咁多書，就係要搭棚大家掠水？

我神農氏上身，以自己條野來做試驗。我係指條腸啫。

泡菜，北方野。我地南方，有炸菜，雪菜，潮州或客家鹹酸菜。。。大家都係醃製蔬菜啫。我以身犯險，一一測試。原來全部都得，食完之後，第二朝就有一篤靚便便。韓國泡菜，幾十蚊一樽，鹹酸菜五蚊一大舊，食幾餐都食唔完，食到你怕呀！

咁大功德，我應該攞獎啦！為幾億南方人口謀福利，我死後要幫我做個石像，放李小龍像隔籬呀。

＝＝＝

人老左，難免要去大酒店躹躬。我就好怕，但係一場老友，頂硬上啦。

問題來了，現在連街市買送，都可以用八達通，口袋中硬幣就唔常有。世事就係咁，你要乜，佢就冇乜。十元、五元、兩元硬幣都有，就係冇一元硬幣。

今朝行過街市，菜檔樣樣菜都係十、十二、十六一斤，係咪攪對抗呀？咦！皇帝菜九蚊一紮喎！買！

咁撚凍，今朝索性打邊爐啦。買買買。。。現在去開餐了。