迷頭轉向

過去的幾個月，都在反覆思量，我應否轉工。現在的工作，性價比十分高，但係人工低。即係冇壓力，工作輕省，不過問題係月光光，自然就心慌慌。

碰巧呢個時候，左腿出現痠痛麻痺。未至於要食止痛藥物，但係並不好受。有時等公車的幾分鐘，都要將個人重心左移右移，去減輕壓力。

有此狀況，轉工的念頭只好打消。一個月，兩個月，持續困擾。。。又唔係日日痛，但有時連坐下都會痛。懷疑係臗關節問題，上網查一下，仆街，嚴重的話要換關節，假如癒合出問題，就大檸樂了。

繼而想到，萬一失去工作能力，以後如何維生。就算領綜援，到時莫講隊啤抽煙免提，連去飲餐茶都唔駛旨意。立即就心都寒。

後來再睇，原來臗關節炎係提腿會痛，咁我又唔係喎。再去操兩日山，症狀消失喎。咁先安樂些。

但係又隱隱覺得有不妥。我錯左乜呢？

===

上星期五的睡到大昏迷事件，又令我心中一直不安。

兩個舊同學出現在家門前的畫面，久久不能忘記。

===

想了很久，終於明白了。

呂純陽的百字銘講，

真常須應物，應物要不迷。

呢個世界，係不停運作，總會有些人，有些事，隨時出現，要你去面對，去應付。你應對時，胡思亂想，迷頭轉向，就會心神恍惚，成個人的根基完全動搖，後果可能好嚴重。

我條腿痺痛，就聯想到生活堪虞，其實因此帶來的痛苦和恐懼，比腿痛更嚴重。何其無謂。

我朋友收到電話，立即聯絡多兩個朋友，可能佢係聯想到會係一單屍體發現案，搵多兩個人一起應付。其中一個事後講返，佢趕來途中，心內不安，到後來聽到我咳嗽聲，個心離一離。可能佢被第一個朋友感染了，自己又加些想像，將個情景再惡化了。

而我見到呢兩人，為之震撼，相信係感受到了他兩的不安和恐懼。

其實，我冇返工，可能係中左六合彩，開心到唔記得要辭職呢！

===

去年有兩單類似的謀殺案，都係潛入鄰居家中爆竊，被戶主撞破，將其殺死，然後畏罪自殺。

其中一單就發生在我工作地點對面。

我想過，其實原本係一單老爆，頂多判兩碌。點解變成了老謀呢？

老謀就判終身，或者卅年後可以假釋呢？何必自殺？

狗急跳牆，人急懸樑。你一急，一亂，迷失了本性，後果就係咁嚴重了。

咁呢種鼠竊狗偷，又唔能夠要求佢可以冷靜思考既。更未聽說過，有人可以厚顏到：嘻嘻，我係爆你格，吹咩？