從何說起

今日，真係大撚鑊。

＝＝＝

早前睇左網上片段，教香茅椰汁芋頭炆排骨的做法，一直想試。今日萬事俱備，就來實踐一下。事成，食落都不外如是。​

咁食完，校好鬧鐘就走去訓。

唔知點解，睡夢中，聽到有人叫我個名。連食神老豆都唔知我叫乜名，我包租公，相信都唔知，莫講其他鄰居。

爬起身，睇下時間，咦？晚上十點幾？我點解仲響屋企，唔係要返工咩？有敲門聲，走去一睇。哇！我兩個中學同學就站在門口。

你地做乜呀？！

你做乜呀！就係佢地既回答。

＝＝＝

我第一個感覺就係迷惘。佢地點會在此？佢地知我住呢區，但唔知我地址。

原來我冇返工，同事就打去我公司，我公司的人，就搵我入職時所提供的聯絡人，阿２３號，２３號都不明所以，問返佢我個地址。然後就搵埋阿１號，兩個一齊來找我。

佢兩個來到，又唔知頭唔知路，拍晒所有門，上上下下找個遍，最後聽到有人咳，先知道就係呢處。

我迷迷惘惘，心神恍惚，２３號電話響，接聽後佢話，１２號來到樓下啦。我話，唔好上來啦，我著返條褲就落樓。

拿拿聲打電話返公司講鎖呢，交待好就去會合。

＝＝＝

１２號把口最臭，一見到我，就話：本來都唔想來，不過睇新聞，柳俊江燒炭，諗住點都好，見到最後一面就見啦。

得得得，係我唔對，我唔著，要大家山長水遠來到。大家去飲返杯。

去到酒吧坐低，有人話，估唔到２０２４年第一次見，係咁樣既。

唔係怕你燒炭呀，係怕你中風，癱左響屋企。

咁又唔係呀！柳俊江早一日仲好積極架，盧惠光老婆，咪又係開完聖誕趴就走。。。

你配返套鎖匙，搵個人保管，不過唔好搵我喎。

失聯幾個鐘，又未報得警，都唔知點好，真係麻撚煩。

。。。

＝＝＝

我的心情，又內疚又感動。唉！