我話事

過去一星期，日頭好陽光，又乾燥，一Ｄ都唔凍。但係到晚黑，愈夜就愈凍。十一月又打風，又凍成咁，真係世界變。天氣凍，自然就想住食。先後整左扮蛇羮，南乳花生炆豬手，再來梅菜炆豬腩肉。食極都係咁凍，自然就想到羊腩煲。一日經過一粥麵，見個餐牌有羊腩煲，竟然叫價一百二十八元。於是我就行入去四圍裝下，睇下有冇人食，睇下係乜野狀況。只見一個大媽，夾住生菜淥下淥下，但係一舊肉都冇，似係南乳粗齋煲多Ｄ。唔駛講，得三，兩件羊肉，半個回合就食完。

心中就生起個叛逆的念頭，我不能任人宰割，我自己來。上網睇下星星師傅，睇下香港祖哥，各師各法，各廟各菩薩，掌握了基本，我都可以有我版本的羊腩煲。星期六下午就去凍肉舖買左兩磅急凍羊腩，再買炸枝竹，柱候醬，連我家中的南乳，冬菇，只要星期日再買馬碲，就可以成事。

話咁快就到星期日收工，買料返到屋企，將雪櫃內已解凍的羊腩拎出來泡水，一邊攪今朝的早餐。食完早餐，屙埋篤屎，就開工。攪了一大餐，已經開始炆。看看時間，已經十二點半，馬仔又開跑，可以一邊跑馬，一邊等佢炆。

堅守住兩個澳洲騎師的扯貓尾關係，潘頓和布文，是但揀一個，今次就揀布文啦，拖另一個新騎師，買條位置Ｑ玩下。吊丫，買大開細，結果開左潘頓和新騎師，布文就臨尾賴屎，無影無踪。輸左十皮，收工。

第一輪炆煮完成，搵筷子篤下，好硬喎。焗佢一陣，再炆。好似軟化少許，但係都係硬。只好再焗再炆。忽然腳痕，不如上大帽山行下啦，好似疫情之後都冇行過呢條路線喎。

執拾行裝出發。

睇過天氣報告，大帽山上溫度有成廿度，唔會凍親，就輕裝上陣，袋住件薄風褸就得啦。上到山上，氣溫怡人，陽光溫暖，冇揀錯。大部份遊人都係向山頂方向行，我就反其道而行，向大欖林道走，初段係連續上斜，雖然今朝冇訓覺，但係行起上來步步有勁，寶刀未老喎。戴住耳機，聽住七十年代舊歌，步伐愈行愈輕快，感覺更係久違的舒適。

呢段路風景冇乜，因為道傍都係大樹，乜柒都望唔到。所以遊人較少。咁就岩晒我啦。人少少地，聽住老歌，喜歡就唱兩句，唔會嘈到人。突然間，仆街勒。原來我炆羊腩唔記得落冰糖，怪唔得咁靭啦。都冇計，或者返到去再翻炆，就會比較稔身呢。

全程九公里，行了兩個幾鐘，正到無倫。經清快塘落深井，出到去就有小巴，回到屋企附近街市菜檔，已經五點幾。羊腩煲一定要有生菜！咦！原來到呢個鐘數，十蚊有四份菜呀！質量都唔係太差，買過就返歸，立即開始淥下淥下啦。

兩磅羊腩，當然唔係一餐食晒啦。搵食物盒裝起兩份入雪櫃，今晚只食其三份一。起爐！羊肉攤左幾個鐘再煮，果然稔好多。枝竹索晒醬香，生菜更係掛滿油脂，冬菇都入味，食到肚滿腸肥，心滿意足。食材加埋一定少過一百二十八蚊，而且我只係食左三份之一。你話而家出街食係幾咁笨實呢？！

今日行山消耗一千大卡路里，一餐就抵消晒，但係值得既。明天一早，再去行過填返條數啦。