該做的事，始終要做

今朝收工，返到屋企，的起心肝，拎盒美源髮采，染返個頭。年幾冇染過髮，立即變黑，自己都覺得好唔習慣，樣衰衰咁。

染完就出發去搵大頭文剪髮。或者你會奇怪，點解唔剪完先染。因為呀，頭髮一執黑一執白，係好難剪，之前就成日剪到一忽忽。

===

剪髮完畢，屎忽痕，不如去粉嶺食豬手麵丫。上次去係暑假，人地拉閘休息，摸門釘。今次唔會卦。

搭車途中，決定一不做二不休，食完麵，去雲泉仙館丫。都唔記得幾多個月前，決定要去拜拜呂祖先師，多謝佢疫情以來，照住照住。但係圓玄學院一直維修，今日既然入粉嶺，一定要履行承諾。

雖然真係好遠，但係拜神要誠心，不能嫌遠。總算順利到達。個場好似大大裝修過，和我印象中變了不少。還是我老人癡呆，忘記了當初模樣！個呂祖寶殿，規模和氣勢，圓玄學院係冇得比，可能係自有安排，要我回到這裏，最初接觸到呂祖的地方。

雲泉另有兩樣出名的。一，係齋菜。我得一條友，食得乜丫。二，就係荷花池。但係時節唔對，乾到剩一池塘泥。

拜神係點樣拜呢？以往過年都會去黃大仙，但只係一個傳統，以前跟老豆老母去，現在當一個習俗咁去。都唔知求神保佑我乜野好。

現在我想到了。就求呂祖保佑我有得食有得住有得著有得訓有得玩啦！