人生另一階段

最近，日日都掛住煮食。

之前行山行到腳板底起水泡，就諗住要補下腳骨力，於是要煲個雞腳湯。呢個好似係民間智慧，以形補形。但係點解係雞腳，唔係豬腳呢？但係花生眉豆雞腳又幾好食架喎，一啖噬落去，然後雞腳趾一節一節咁啜，一節一節咁吐出來，嘩！好過癮。上網查一下，就決定去買個木瓜來煲。但係菜檔只見青木瓜，心諗，都係木瓜，嫩口Ｄ啫，一樣啦。十二蚊一個，食得起。切左半個來煲，都幾好。但係，應該用熟木瓜，黃色的，應該會更甜。

剩返半個，點呢？研究左好耐。本應用來做個泰式青木瓜沙律最合適，但為了方便，煲了木瓜雪耳湯。都好，幾清潤。

轉下眼，又臨近冬至。今年係廿一日喎。不如自製一個盤菜啦！其實扮下野，湊湊埋一煲過，乜都有Ｄ，係好易的事，望起來好豐富，拍個照去呃下人，大家開心下，幾好丫。又上網睇下，鮑蔘翅肚就無謂啦，豬皮蘿蔔咪得囉。就走去街市搵沙爆豬皮。一睇，哇！成五十蚊一小包？豬皮咋喎，唔係下欄野咩？尚有大把時間，再研究下先。

呢個時候，淘寶貨品又到。其中一件係噴槍。即係套落個打邊爐用的石油氣樽就可以噴火的，可以用來燒豬毛，又可以用來造成烤焗的效果。咁，就攪左個扮焗豬扒飯。第一次用，火力唔均勻，成績麻麻地。試多幾次，就會改善。

＝＝＝

呢兩日阿頭失驚無神就閃左人。原來呀，佢屎忽有問題。

半年前佢突然請病假，原來係心口痛，驗過發現係心臟三條血管塞左兩條要通波仔。攪一大餐，返到來不久又話貧血。原來係佢痔患嚴重，通波仔後一定要食薄血藥，咁就次次開大都血流成河。然後因為痔瘡紮無可紮，要入廠做手術。常識來，佢今年應該洗左十幾萬去養醫生。

但係痔瘡手術最大問題，就係個傷口好難埋口。你日日都要開大，即係日日都要衝擊個傷口一次，又點會癒合呢？聽佢講，痛起上來係要生要死。最慘係流血不止。呢兩日失踪就係要返屋企開盤藥水浸住個屎忽。

＝＝＝

人生有乜野係必然呢？就係死。只係好人好姐之時，你唔知幾時死，因乜死。中山美穂，周海媚，李玟，Sinead O'Conner，咁樣突然死反而瀟洒。你要好似劉家輝，張偉民，秦煌咁，拖呀拖，個樣去到最衰咁見人，咁就仆街啦。

不過，有得揀咩？

所以，現在想食乜就食啦。我深信，除了星級廚師之外，只要我試多幾次，我一定可以煮得比街外食肆好。

有得食，有得玩，幾好呀。