功德無量

呢幾晚冷得我騰騰震，忽然醒起，咁環境，最好係食胡椒豬肚湯啦！一收工就去街市，四圍搜索，終於買齊晒材料，一袋二袋咁興高采烈返屋企。

忽然有個賣菜婆叫住我，原來想我幫佢將兩個發泡膠箱抬上手推車。我一睇，嘩，唔野小喎，阿婆係年紀大，但我都唔係十八廿二，加埋仲要加多廿一呀！我衡量自己的身體，不得不拒絕。我話，你搵個後生的幫你啦。

返到屋裏，將食材解凍清洗，就坐低休息一下。想起支結他，可能係天氣乾燥，琴頸變形，有條弦彈撥時發出噪音。就摷支六角匙調校下，哦！得左。

一不做二不休，我有一個吸塵機，叉電條線不小心弄破了，原來係內有機關，係將USB 的5V，轉成9V，要維修就必須先摷返隻辣雞出來。咁大工程，想起都煩。拖了幾日，趁今日幹得起勁，就做埋佢啦！

翻開儲物箱，未搵到辣雞，就先見一隻火牛，一睇，9V喎，個插頭好似樣喎。一試之下，嘿嘿，天衣無縫。咁就免了我許多煩惱。安心去訓覺。

訓醒就開始攪個豬肚。雖然急凍貨已經有初步清潔，但係內裏肚膏，真係好麻煩，又洗又刮，又用生粉，又用醋，先至洗得乾淨。之後對手要洗好耐，先至洗得乾淨。

一番功夫，終於有得食。做得辛苦，食的時候就更滋味，更有滿足感。

今日真係多多付出，滿滿收獲。