堅哥真係堅

簡述我工作環境。我係一種叫頂更的工種，人地公司，本身唔夠人，就去搵外援，呢Ｄ叫頂更。我就好彩，可以做一個頂更，頂得來又長頂。阿頭又體諒，日日早一個鐘就放我走。所以做到我唔願走。

但係個場始終唔夠人，就要搵兩個頂更。除我之外，另有一個。咁，我就日日要面對另一個頂更。之前講過，肥妹大軍，未訓夠，叫唔醒，熄燈訓，都係頂級極品。中級的，你同佢講，佢就插嘴，有冇得叉電呀？

當然亦有絕世撚人級的蕭偉元。喜歡就走去訓。休息時間完都唔出來繼續訓。亦有唔訓，但係要你和佢同流合污，唔著制服，唔抄車牌的陰九幽。

呢個世界有西人，亦有東方人，只係比例問題。天可憐見，終於遇到有似人樣的人。一個阿康，大家傾談間，知佢肯做，又喜歡呢個場，就提議佢同公司講，安排佢長駐呢個場啦。但係因為佢之前太過易話為，乜地方都肯去，公司就勒住勒住，係加左佢到此場的日數，但係都未能長駐。

另外仲有個阿堅，睇樣真係不敢恭維。鬍鬚甩突，棚牙，唉。但係傾落，真係人一個，係食飯，唔係食屎架。

而且我見得仆街多，成日投訴，怨氣沖天。就係阿康和阿堅，兩個會聽完畀意見，人地點諗，佢地既事，唔好自己上心呀。

開頭我都唔醒覺，聽聽下，先發覺，我成日呻，把撚咩？開始聽下佢地講。我成日投訴呢個果個，有結果咩？咪又係繼續。自己嬲，又於事無補。

昨晚，又係阿堅，講起對講機成日有人屎忽痕轉ＣＨＡＮＮＥＬ，我話都唔知係心地唔好，定係白撚痴。佢氣定神閒話，人地點做，由得佢。自己唔好嬲。

我立即停下來。堅哥，真係冇得頂。