忽然，唔知發乜野神經，想安裝天台的魚骨天線。
現有的，已經用了不知多久，肯定係山竹，天鴿呢類勁颱風之前就安裝。現在已經甩皮甩骨，所以有時電視接收得唔好，唔係性器官都會打格仔。節目表又遲遲未出到。因此先會淘寶網買來更換。
但係，就係懶，放下一日，放下一個月。都未動手。
今日，終於的起心肝了。第一步就是將組件裝嵌。打開說明書，吊，你講乜呀？不過難我唔到既。一味靠估，兩下手勢就攪定啦！
最難的是擒高擒低。帶齊架生，就上去天台。心中希望食神老豆會在天台，咁就有人幫我護法。點知連貓都冇隻。唯有頂硬上啦！
廿年來，今次已經係第三次裝天線，話危險都唔太危險，但總有一定程度的危險，如果一個頭暈眼花，踏空了就會飛街。最要命係我有畏高問題，年紀愈大，心血少，就愈膽顫心驚。
過程唔多講了，一路手震腳震咁安裝完，拿拿聲落返地面，走返屋企睇下部電視。睇到有畫有聲，咁就放心啦。如果唔得，都唔知有冇勇氣再上去執正佢。再逐個頻道試試，節目表試試，全部正常，冇以前的窒窒下，十分滿意。
最滿意係少左件野阻住地方兼篤口篤鼻。上淘寶網查返係幾時買，仆街，原來係去年一月。拖延了整整一年，你都得勒。
完成了一件大事，個心有種自豪感。不過仲有好多家居維修要做，希望過年前可以完成啦！
沒有留言:
發佈留言