畢生志願

我呀，有個夢想，就係在馬場過關贏錢，然後夾疊買落晒落去六合彩，過埋呢關，中個滿堂紅。

星期日休息，訓醒就賭馬。第五場，睇左一輪就跟飛買條鐵三角位置Ｑ。吊佢丫，隻同喜放到最後一百就冇晒，雖然買到頭馬，都係得個睇字。

到呢個地步，呂健威已經贏左兩場。我翻開資料，呂健威和蔡約翰都殺聲震天喎。立即變陣，買呢兩條友第七，八，十場位置Ｑ，三穿四過關。

第七場不負所托，一Ｑ返來。第八場，阿蔡跑第三，阿呂跑第五，吊丫。到第十場，勝負存亡就睇你勒。入到最後二百，六，七大好形勢。六，七；六，七。點知內欄有隻仆街穿甲金鷹殺上來，終點前好似趕過我隻做你老母。唉喲！

以為又做左悲劇英雄。電視重播衝刺鏡頭，咦！一上一落，好似仲贏少少喎。公報名次，我贏左。即係過左關！有錢收！

王晶電影教落，賭錢贏就谷，輸就縮。唔理三七廿一，將投注戶口所有的所有，曬冷，全部買晒星期二晚的六合彩。

＝＝＝

今日星期三，六合彩當然已經有結果。咁～～～我當然中左，先會在此認屎認屁啦～～～輸左梗係收埋揼袋袋啦。中左一注四個林把，收六百四。計計埋埋，八十蚊開頭，結尾有六百四，即係有五百六落袋啦。最緊要有本有利。

＝＝＝

本應開心的時候，我另有體會。

得閒再講。