理柒佢

最近網上平台，出現了一類短片，叫做nothing happened 。例如一段行車紀錄，由頭睇到尾，完全冇野唔妥。諗落又幾有智慧。好多人睇手機睇到傻鳩鳩咁，搭車睇，行路睇，連過馬路都唔睇車，只睇手機。整呢類片來玩鳩你，睇丫啦！睇丫啦！咁喜歡搵野來填滿空檔，秒秒鐘都要娛樂，我就消耗你時間，但又冇娛樂。

另一方面，睇報紙本想精準獲得資訊，偏偏又好多標題騙案，呃你入去睇，睇完。。。吊一聲。

咁又好難怪。。。好似人民期待著政府為人民服務，但政府下下都玩鳩市民。搭巴士要戴安全帶呢樣野，未到一星期，就有人剪㫁巴士的安全帶，或者塞錫紙入去破壞。就知道幾令人反感。

乜撚野簡樸房咁，一早就有人話會推高房租。上星期仲有人被迫遷。

連政府都亂鳩咁來，又點期望報紙佬，甚至網民會負責任丫。

所以都係理柒佢，我顧好自己個肚先。

我係咖喱牛筋腩控，平時出街食，又份量細又唔好食。前日就的起心肝，自己來。第一次攪，都失敗一半。因為牛孖筋要炆得耐才稔，我就一時錯手，炆過頭，溶左一半。蝕晒啦。不過都食得好過癮，下次再努力。

又在網上睇到鴛鴦炒飯做法，都幾多工序。退而求其次，今晚只做蕃茄一邊先，唔炒飯，用白飯底。原來個蕃茄汁臨尾要加些少米醋，去突出蕃茄味，今晚一試，真係升左一級。好有成就感。

仲有半份雞絲剩，想下點整先。。。