事緣同工阿巴基之星，最近回鄉探親，一去就一個月。咁就剩返阿頭和自閉仔兩個正裝、加我和阿康兩個外援。我就在此比較耐，阿頭就叫我在自閉仔休息的日子，幫手做多D野。其實有幾多野做丫，冇所謂。咁在自閉仔休息前一日，就搵佢取經，有乜要做，點點點。。。詳情唔講勒、總之就被自閉仔激到我嘔血。我誓神劈願，我以後話之你仆街！我乜撚都唔理。
贏完馬，自我感覺良好。但係有自閉仔事件簿，兩件事一加埋，就令我感嘆，我能力雖然唔係好標青，但都有板有眼。你睇我買馬，單棍過關都過到，我絕對唔係靠符碌。但係一生事業都一塌糊塗，何解呢？
無非都係捉錯用神。
讀完書進入職場的頭幾年，上司都同我講，最重要係TEAM WORK，團隊精神。我覺得好合理丫，一個人能力有限，大家分工合作，互補不足，咁先可以成就更多。
點解老細會咁講呢？其實就係因為冇人會有團隊精神，個個各懷鬼胎，不單只同級的見不得你好，每每會趁機攪破壞；有時就好似自閉仔咁，蠢到死老母，拖你落深淵；有時就連老細都怕你有功，要質死你。實在荒謬至極。你唔識走位，難免死無全屍。
迷途小羔羊迷途了一輩子，真係唔到你唔認自己戇鳩。
＝＝＝
所以上星期三，一開工就三扒兩撥做完要做的事，然後就專心賭馬。用我的觀察力，分析能力，加上數十年的經驗，度左條奪命三穿四。因為上次贏左，有本錢，就試個新方法，每關一拖二，兩隻腳一冷一熱。注碼大左，希望開冷，咁就有斬獲啦。結果三隻膽都中，但係只有兩關的熱腳開出。雖然過到兩關，只因賠率乏味，到最後都要輸少少。
到星期六晚，夜深人靜，最好刨馬。晨光初現時，心中已有腹稿。返到屋企立馬打開電腦，再作最後核對，就買左一條天下無敵、位置Q五穿二十六。落完注就走去眠。
＝＝＝
醒來之時，剛開跑第一場，唉吔吔！一念之差，只中一隻。沖壺茶，潤一潤喉，你嚇我唔到既。第二場又開跑，無驚無險，中到應一應。好！叫糊！
個肚開始餓，賭馬不能夠賭到不務正業，於是去炒飯，順便清埋個雪櫃入邊的油麥菜。一邊炒菜一邊聽到電視機聲，個講馬佬嗌到聲嘶力竭，就係嗌緊我買的兩匹馬，菜炒熟時，馬匹過終點，我買條位置Q一Q返來，雖然有研訊和抗議，但係我買位置Q，告甩與唔甩我都中。食飯可也。過左兩關，食得特別開胃。仲有兩關係第九第十場，到成五點先跑。天氣寒冷咁多日，今日終於回暖，一於去行山。
買支水就去搭車上大帽山，沿途風光秀麗，心大心細，上山頂好呢？還是去清快塘？都係行段輕省的好，去清快塘。
年紀老邁，不復當年勇，行得比較慢。去到田夫仔附近，又開跑啦。紅米手機雖然便宜，但係有FM收音機，去到深山中，冇手機訊號、但仍有收音機電波。班講馬佬對我買的兩匹馬彈三彈四，又話匹馬博左咁多次，鐵打都攰啦，KEEP唔KEEP到呀？呢一匹根本唔係最佳路程，唔睇好云云。結果咪又係跑左出來～～～講馬佬咁好眼光就唔駛講馬啦，專心、靜雞雞、全職賭馬咪得囉。抵你要成世講馬。哇哈哈！
至此已過了三關，去到有手機訊號的地方，上網查下戶口，已經有本有利，笑到合唔埋口。去到清快塘，荷花池冇乜荷花，但係有兩隻禽鳥，我幾十歲人都未見過。腳就似鴨，有蹼；嘴就似雞，尖既；又唔似鴨或鵝有條長頸；毛色係白底，頸有紅斑。奇怪！
離開清快塘向深井進發。跑第十場，講馬佬又彈我隻馬，話佢上次係贏得精彩，但係今次加左十磅、又大外檔，難度增加呀！我驚都未驚過，結果真係贏唔到，不過跑第二，我條位置Q中到正。
振臂高呼！一生人第一次位置Q單棍過四關。立即將投注紀錄發上WHATSAPP群組，再用青馬橋做背景，自拍一幅舉起四隻手指的認屎認屁照片，發畀一班老友睇！
埋單計數，其實唔係贏好多，因為都係買穩陣的熱門，但係至緊要係中，和創一個新紀錄。
＝＝＝
TEAM WORK？TEAM你老母啦！我孤身走我路！
順便再吊太監陳老母！
1234 1238 嗯
回覆刪除