理柒佢啦！

本來打算今日去報讀QAS課程，但係六點醒來，摸下摸下，已經七點半。心諗，乜時間過得咁快，八點半上堂，仲未食早餐未屙屎，要好趕好趕。把心一橫，吊佢老母，唔撚去啦！明天再算啦。一號開始放假，個人都未補眠，當然唔去得，二、三號全身唔舒服，又唔去得，今日四號，個天落雨又凍，都不適合。就係咁，我成世人都多多藉口，乜都拖得就拖。

吹咩？邊個會鬧我？邊個管得我？我任性！我係一個浪子～～～哇哈哈～～～

至多明天再早早起身去上堂囉～～～唔係點呀？

其實呢排都積埋好多感受，趁偷得浮生，去理順一下。

＝＝＝

第一件當然係美國仆街，同以色列仆街，今日仲會談緊，突然就去殺人全家。吊佢老母！

＝＝＝

肥貓舖頭，過完年就摺埋左。雖然肥貓走左好多年，但係我仲當呢間舖係肥貓的家。現在摺埋，想念的憑據都冇埋。

＝＝＝

我的飛髮佬大頭文，走左接近一年了。最後一次見，係二月八號。當時發覺佢唔妥，都唔知點反應。後來回想起，真係後悔點解當時唔留低傾下偈。

＝＝＝

食神都走左五年。佢死前一晚，我有上過去探佢，只見佢坐定定冇反應，唔知原來佢已經係弱到不能起身。後悔無入去摸下佢。

＝＝＝

我老豆都走左十一年多。人生憾事多籮籮。記得當時知道佢處於彌留狀態，本來我打算飛過去，正在上網查機票，就收到消息話走左。做戲都冇咁橋。

＝＝＝

六年前，新冠爆發，單生意被個客玩到我山窮水盡，個QAS證書又過左期，想去報讀亦冇班，想做看更都無從。濕疹煎熬，日日坐困愁城。四圍都封鎖，想搵朋友都唔得。每一個清醒時刻都係痛苦。現在想起個心都痛。

＝＝＝

廿年前，有一晚快活谷賽事，我連過三關，贏接近三萬，拿拿聲走去投注站轉帳。當時仲未跑尾場，心中盤算，死Q一條，機會極大。但係個心又怕，萬一輸左咪得個桔？結果當然係跑左出來。後來想，你有三萬，買一萬，輸左都仲有兩萬，點解咁蠢，唔識分配注碼？中左就有五萬，你當旺都唔把握機會，蘇州過後空餘恨。

＝＝＝

現在學會，有一日過一日，今日過唔好，點過第二日？人地講乜？理柒佢啦！好似以前話要多菜少肉，現在突然大反轉，要多肉少菜。你玩鳩我呀？

我吊你都仲得呀！