朦X查查年宵夜

上一次講到，買巴基之勝，係二月份終於贏馬。事後先醒起，原來已經係三月一日。我實在係老到傻傻地。

查實我二月份最後一個星期日，忽然間發現，右腳好痛。我都唔知有冇整傷過，只知行起來，痛到柺下柺下。以為佢會自己好，點知愈來愈痛。大約到星期三，先知唔可以唔理，就捽下藥油。有點好轉，但係一路都唔好。

星期日，即係三月一日，休息啦，以為休息下就會好。三月二日星期一一早，要去洗衫，感覺腳係好左，但係成個人好唔妥，成個下半身痠痛，個人疲倦不堪。捱到晚上八點幾，頂唔順，一早就眠。竟然冇夜尿，訓到四點才醒。感覺再唔去廁所就會中尿毒。

去完廁所就沖茶飲。個人只覺全身冤痛。回想起自從年初一去過引水道，初三行過西貢，就冇再行山。負能量一定累積到爆錶。今朝三月三日，元宵佳節，唔理腳痛唔痛，一定要上城門勒。

新年以來都未飲過早茶，就上象山搵光頭佬啦！一切保持水準，不過茶客買少見少。飲完茶就行上水塘。點知狀態真係唔掂，步步都係拖泥帶水。

心諗，做乜會咁？堅持！一步一步走。咁難先來到呢個地埗，放棄就輸晒。由象山行上可風，再一路上條暗斜，幾經辛苦先上到城門。去到茶水亭，循例都要去廁所鬆一鬆。但係竟然，連屙尿都冇力，只有聊聊數滴。

唉！我老勒。

再上！個心有想過行入水塘，但係都係量力而為，都係行平路啦。一路上斜，真係步步艱辛，憑的是意志力。轉入平路，漸入佳境啦。

講左咁耐，其實我隻右腳仍然係痛。只係冇柺柺下。真係一步一天涯。在引水道行左四公里左右，愈行愈痛，都係要量力而為，如果加深傷勢，咁就仆街了。結果決定往圓玄學院方向走，落到去，都無謂入去參拜，直接搭車走了。

今年丙午年，真係險阻重重，要醒醒定定，唔好衰收尾。