睡得好

星期日早上，收工時非常疲倦，可能係天氣潮濕，老人家頂唔住。電話響起，係公司打來，叫我開工，我個心十五十六，搵得一更得一更，但係咁攰，怕支持唔到。講左一大餐，佢先至話，唔係今晚呀，係今日。我吊你老母啦，即係叫我現在去救更？你當我鐵人呀，連踩廿四小時，又照正常人工，我吊你都仲得呀！吊到佢鎖理連連。

返到屋企，隊下啤就去訓，下午醒來，行行企企又天黑，又訓。到今朝五點鐘，鬧鐘響，好唔情願之下起身，開個手機APP睇下，原來我昨晚九點幾訓，一覺到五點，如果唔校鬧鐘，不知會訓到幾時。電腦分析，我的睡眠質素係GOOD。平時日日都係POOR，怪唔之得我咁窮啦。

五點起身，為的是去洗衫。去到自助洗衣店，有個人企響洗衣機前，目不轉睛咁望住佢轉轉轉。我都唔明白，D人點解咁細地方，而且洗一轉衫都要卅分鐘，咁都睇得一餐。忽然醒起，貓係會因好奇而望住洗衣機轉轉轉的。我面前呢條仆街，可能其實係貓妖，千年道行，化成人身。我要好小心，唔能夠得罪佢。

攪定一切，都已經七點幾，上星期大雨冇行山，今日點都要去。

上到水塘引水道不久，就遇到個阿婆山友。平時大家都見慣見熟，照例講句早晨。但今朝阿婆就唔講早晨，佢話：我頭暈呀！

我：吓！你琴晚飲好多咩？

婆：我食左粒糖。

跟住擘大個口伸條脷出來，上面有粒糖。

我：你咁核突架！？

婆：我有三高。我老公早兩年死左。成九十五歲。

我：對住你都捱到咁耐，佢都好堅啫。

婆：我都八十幾，仔女各有各住，而家我自己一個人住。

我：你莊重D啦，四圍同人講死左老公、自己一個住。。。

婆：我聽日去覆診。

我：不甘寂寞係冇得醫架。

婆：你咁好心，個天一定庇佑你。

我：我頂，個天玩左我六十年啦。

跟住我就走人，頭也不回。

以上對白，阿婆講的，句句屬實。我所講的，係我事後老作。

冇。做人唔想辦法逗自己笑，仲有邊個無條件逗你笑？