愛與痛的邊沿

星期日，收工就回家眠，下午醒來，就出發去牛頭角理髮。對一個孤獨老人來講，理髮都係假日節目。識左大頭文廿幾年，講下賽馬，講下飲食，有個人傾下，個口冇咁臭。

之後出旺角行下，都幾多人，似乎是國內同胞多，尤其是星際城市，竟然有人排隊買相機。

我都冇乜過節概念，月餅一定唔會買，端午多數去粥舖食隻糉。今年就有人送我一隻美心裹蒸糉，過程有點被騙成份。呃你收佢隻糉，講都冇人信，都係唔講了。

上網查過，都賣成七十幾蚊，食完覺得，倒不如大家樂早餐的咸肉糉。

星期一，一早就醒，忽然興起，去大埔街市食點心。間野被小紅書吹捧，可能好快就加價。外賣竟然要排隊，咁遠來到，死死氣排啦。乾蒸牛肉，潮州粉果，雞絲粉捲，共卅五元。都唔敢批評了。

之後搭巴士新界行大運。返到屋企，見食神老豆攪緊樓梯燈。應該係接線有問題，四樓以上都冇電到。上次觸電都未驚完，我幫你唔到了。

到今朝，七點幾被雨聲嘈醒。又冇得行山了。乖乖的等返工啦！

屋企附近有間士多舖，一向都覺得有古怪，好多人拎住黑色膠袋出來。前兩日終於知道，原來係賣私煙。本來犯法野我係唔會做，但係，一包煙平六十蚊，咁就令我腦交戰。思前想後，想了又想，想完再想。。。

都係買左。