盡人事、順應天命

昨日一早睇新聞，有個八十幾歲老翁跳樓，當場命喪。據悉係唐佳，即係當年著名武術指導，電影紅星雪梨的丈夫。好唏噓。

到傍晚食完飯睇新聞，嘿！姜濤墮海喎！網上當然好多傳聞，亦好多未審先判，幸災樂禍，乜柒都有。

當然唐師傅已經淡出娛樂圈多年，比較少人提及。我私底就就覺得，自幼練武，意志力一般比較強，奈何年紀大，妻子又臥病在床，都好難樂觀。要走到呢步，一定情非得已，所以特別唏噓、難過。

至於姜生，有人話，連王晶咁撚肥都批評佢肥，真係奇恥大辱，好難過到呢關。我對呢條友冇好感，但係我唔鳩理佢，話撚之佢啦。點知有時SPOTIFY明明聽緊舊歌、插左首佢既歌，我就好撚反感。

＝＝＝

又到理髮時間。上次試那個飛髮佬，好就講唔出口勒。用手一摸個後腦，硬係覺得唔撚掂。又懶得去再搵第二個，所以再幫襯。今次剪完，吊！以後永不錄用。

以前幫襯大頭文，每次剪完，大頭文循例拎塊鏡照下後尾枕。我都一定話，唏！唔駛啦。每次畀錢，我畀一張紅衫魚，佢找我十四元。如果係過年前雙工，我就畀兩張紅衫魚，佢都話：你唔駛啦，一張得啦。

如果現在呢個單剪髮的，收我八十元，大頭文起碼值百六。再洗頭、吹頭，大頭文理應兩舊水起碼。

呢樣野其實好難計。大頭文牛下起家，一路都係做草根大眾生意，如果加廿蚊，就可能冇得撈。

＝＝＝

跳樓、跳海，飛髮佬，點會拉埋一齊講？

就係命，唔係有本領就有收穫，唔係乘風破浪就係好，人生總有起起跌跌，個天要你死，你冇得唔死。自己尋死，係睇唔開。

＝＝＝

９９年開始幫襯，每個月飛一次髮，即係飛左三百次髮，每次都畀少左一百，咁計法，未計利息、通脹，我欠大頭文三萬元。