結婚

＝＝＝

又係小楊結婚。除了人人笑到見牙唔見眼之外，有冇留意到，外父將新娘交給新郎時，死老豆咁款，之後仲偷偷抹眼淚？

令我回想起，以前老友結婚，去做兄弟，去到女家，講完數，入到去接新娘，斟茶時，個外父流眼淚。傍邊姨媽姑爺話，外父最疼呢個女，因為佢自細就好好笑容，好得人錫。可惜呢段婚姻，最後敵不過七年呢個保鮮期。

＝＝＝

回憶起以往經歷過的婚禮。都做過幾次做兄弟，但係冇一次做伴郎。無他，皆因我高大威猛，俊俏不凡，搵我做伴郎，新郎黯然失色，點算呀。

＝＝＝

某次婚禮上，拍照時間。攝映師叫新郎哥笑多D。換第二批賓客，攝映師又要提醒新郎哥笑。最後新娘子忍唔住，講，佢梗係唔笑啦，佢被迫架。呢一招真係駛得，新郎哥成晚唔敢唔笑，笑到臉頰抽筋。因為新娘出名巴辣。據我觀察，外母娘都係成晚冇笑，凶狠係有遺傳的。

＝＝＝

一次，姊妹團真係玩人唔駛本。娘家住低層，要個新郎去樓下講愛的宣言。新郎哥同兄弟們講，你地陪我去丫。最戇居係我，拍心口上。結果得我同新郎兩條傻佬在樓下，其他人唔知去晒邊。街坊阿婆最多事，圍觀起哄。新郎交完功課，我叫阿婆，你地拍下手掌啦！總算開開心心。

＝＝＝

反客為主。婚宴上通常都會玩新人。但係有次，新娘子真係把炮，當一眾人飲左兩杯，開始敲碗敲碟，大家起哄。都唔知邊個傻佬出來玩新人，拎起支咪，講得兩句，新娘就接過支咪，講一輪客套說話，謝謝各位來賓。然後就逐對夫婦朋友擊破，每對夫婦都撞邪咁，新娘叫佢打笳輪就打笳輪。我就單身狗一個，你都要安排條女過我丫。

＝＝＝

到我細佬結婚。因為移居加拿大不久，雙方都冇乜朋友，一切從簡。咁就我姊夫車我，和細佬去接新娘。都冇乜繁文褥節，提貨單都唔駛，去到就開門，新娘就捧住花行出來。我細佬十下十下，企鵝咁。我就話：喂！接新娘呀。咁先曉得走埋去。

跟住新娘的家姐就來和我寒暄。好衰唔衰，出門之前，我在家中走出後園行左一陣，相信就係呢個時候，有隻唔知乜野昆蟲捐左入我條褲。去到呢個時候，爬到上我蛋蛋。女家係知書識墨之人，佢家姐就同我講國家大勢，我就蛋蛋癢癢的。可能對方覺得個妹嫁錯人。

＝＝＝

合久必分。最早結婚的，亦最早離。

出來飲野，講兩講，佢話，我同你講，你唔好同其他人講喎。各位，如果有人咁樣同你講，你立即要停住佢，咁你唔好講勒。當時我梗係唔識啦，聽完之後，都唔識反應。乜野事，我當然唔講啦。

另一個。突然一日，打電話來，問我住處可否容佢暫住，訓梳化就得，租照夾一份。唉！

好在另外兩個離婚的，冇搵我傾訴，否則我吸埋太多負能量，活唔到今日。