立春

上回講到，部CD機瓜柴，唔知點好。要知道，上淘寶網買一部DVD機，不用一百元，乾手淨腳，仲可以睇電影添。如果要動手修理，我上網查了，係要換鐳射頭。

聽到都煩。網上有視頻教學，睇完覺得仲煩。萬一換完都唔得，咁就揼袋袋了。

最後，基於卅五年的感情因素，決定動手修理。上淘寶網搵零件，原來只需羊卅，已經係發燒級零件。收貨後拖延了一個星期，前日飲啤酒飲到揩揩地，膽粗粗開工。

原來網上教學條友仲論盡過我，攪到鬼咁複雜，原來好簡單。要讚下原先設計呢個CD盤的人或團隊，佢地考慮過維修的問題，將一切模組化，每個模組又易更換，所以三扒兩撥就換好。

但係好事多磨，係我老人痴呆，上錯螺絲，整爆左個窿。結果要去買鋼塑泥來修補。原本一日完工，變左三日。係有少少瑕疵，不過卅幾年貨仔，可以行得，而且升級了鐳射頭，覺得音質改進左添，實在係大喜過望。

咦？今日立春喎，以術數角度睇，已經進入丙午，馬年。今日完成了一件大功德，係好兆頭呀！