新年流流

上星期五，係年廿六，和朋友飲茶行山之後，一直盤算未來兩日要攪清潔。但係每日收工，都總係多多藉口，無乜進展。

我都唔記得呢幾日做過乜，好似買左d乾糧以備不時之需，又攪下個midi keyboard ，玩下呢個玩下那個。到年廿九，朝早買兩棵菜，買舊肥豬肉來拜神。然後清左香爐的香雞腳，剪下指甲，剪下鼻毛，拎晒垃圾去垃圾站，咁就當大完掃除。

初一清早，將齋料浸水，又攪下個keyboard，再煮一大鑊南乳齋，食完午飯，然後就出發去行山。上到引水道，天氣宜人，行得好爽。但突然肚子唔舒服，急急轉軚，去西方寺方便一下。

晚上開工百無聊賴，想起個新耳機，係就係好聲，但係唔貼耳。想起人地係做個耳模去配返個耳機，就上網查一下，哦！看似不難。上淘寶網查一下，材料又有得賣喎，仲係德國貨，應該安全。等過完年就去入手。

初二一早，行經救世軍專賣舊貨的店，窗櫥內有支結他，都算名牌，賣四百，上網查一下，評價唔錯，係平價貨的有水準之作。好，等初四一開門，就衝入去買。

返到屋企，又攪下個keyboard ，又攪起個火頭，決心要深入研究下點玩先得。

新一年突然雄心萬丈，老馬有火。好事。今朝打算去西貢行下山。行個大運，希望唔會又行到肚痛啦！