年尾流流

一月份寄情賭博，慶幸在馬場有少少收穫。男人一有錢就身痕，想買玩具。社交平台唔知點解，好似洞悉我心咁，成日推介一些入耳式耳機。推得最多係一隻從未聽聞的牌子，作為一個精明消費者，當然唔會咁易落搭。但係日夜轟炸，真係心動了。早前我一對名牌藍芽耳機瓜左柴，我就決定唔再用藍芽耳機，因為電波對人體始終唔好。於是就搵有線的耳機。

睇來睇去，屬意一款NAKAMICHI的初階耳機。呢個品牌，如果有咁上下年紀，又對音嚮有些少嚮往的，都知道當年最出名係卡式錄音座，賣得特別貴過人，我就未聽過，所以唔知有幾好。咁後來出左CD，搵鳩買卡式機咩～～～於是佢就轉型，做汽車音嚮，和耳機。

研究左好耐，終於定案MV２００。官方定價五百幾，網上搵到旺角只賣三百。其實都心大心細，擔心自己係一時衝動，只怕買完又係擺多過聽。

＝＝＝

呢排天氣冷，到星期六回暖。心諗太耐冇去西貢，一收工就去食早餐，然後就回家開個大，作好準備去行山。一路順風順水，呢頭落車，就有接駁車到，好快就入到黃石碼頭。噢！氣溫剛剛好，慢慢行，有些少汗。上斜路段都冇話扯晒蝦，非常療癒。行到咁上下，巴士到，就去西貢市中心食晏。今次終於遇到泰國婆有開舖，食左個雜燴炒河熱檸茶，＄４８。平絕西貢啦。

搭返車出市區，去到彩虹港鐵站，天使與魔鬼角力勒。都係魔鬼強勁，去提款機撳錢，然後搭車直奔旺角，買了三百元耳機。

回家急不及待就要試聽。攪一大餐，最大問題係耳塞部份和耳窿唔夾、不能緊貼，結果就漏聲，令低音不足。如果用手指頂實，低音會更好，總的來說係好好聲，三百蚊係絕對超值。

＝＝＝

星期日，半夜轉冷，好在早有準備。收工一回家就刨馬仔。冇乜心水，只好走去訓。醒來開跑，買一注輸一注。又去訓，再醒來仍未跑完馬，我爛賭，再博過，又輸，到尾場，死唔信邪，再買，輸仆街。全日輸我九十元。戶口剩返十元，寧為玉碎，買埋六合彩。戶口清零。

晚餐又係打邊爐，食到飽飽滯滯，九點幾就去訓。醒來天還未亮，去個廁所，睇下鐘，四點幾？再訓過。好似訓左好耐，終於醒，知道夠晒皮就起床。但係睇下個鐘，只係三點幾？呢一覺穿越到過去？沖茶飲下，睇下電視，到六點左右就拎衫去洗。挨年近晚，床單薄被都洗下啦。洗完衫食完早餐屙完屎就去城門行山。

本來有陽光，都好暖和，行到中途，烏雲遮天，刮起風，凍到我震。去到尾，近茶水站，見到條友，黑衫黑褲，仲唔係發叔～～～　行近一睇，嘩！老態龍鐘，塊面巢過合掌瓜。早一個星期盧海鵬開騷佢去撐場，都唔係咁殘架？聽王晶講，佢拍戲開鏡前要搵人做推拿去水腫，原來真係咁大分別。

行完山十點。返到落市區，就去裕華保健坊，買樽舒肝丸看門口。過年屋企冇米都冇問題，超市長開。但係藥房就會休息，有乜野應急藥物就要買定。

之後就去飛髮。早前搵到檔大媽理髮，正價卅九單理髮，長者就卅元。佢見我白頭髮多，就當我長者，只收三條野。我估佢就冇乜正式訓練，但係工多藝熟，個電鏟飛快，竟然鏟得幾好，比起八十元單剪店好得多。今次佢有告示話新年加十蚊，埋單只係收我四十，超值呀。個大媽仲一路剪一路落嘴頭，話我頭髮白得來好有型，千祈唔好染黑呀。阿叔閱人多矣，呢D說話，我點會信呀。我深信係我天生英偉不凡，黑髮白髮，點都咁有型。嘻嘻～～～

理髮期間，電視播新聞，黎智英判廿碌。其實早一個星期，和朋友隊啤吹水，就講到呢條友，如果判十五碌或以上，以佢七十九高齡，就一定出唔返來。到時我就劏雞還神。咁現在廿碌喎，咁就要希望佢長命百歲，唔係就坐唔足廿碌，唔抵丫嘛。

離開理髮舖就沖去搵雞佬。嘩！排晒隊，人人都劏雞還神？四十五元半隻白切雞，返到屋企，裝注香答謝神恩。然後開啤酒暢飲。呢個午餐，一條友就食完半隻雞，痛快！

＝＝＝

晚上開工，做完要做的，就上網四圍超。一早預左，一定有人出來博懵。果然～～～

有人話：做傳媒就要判廿年？十年？七年？

以前我就會嬲，今時今日，我覺得，你唔怕被人笑你白痴，你唔死都冇用。不過唔好令國際上、人人都以為香港人好似你咁蠢到死老母丫。

你地呢班友仔的技倆，數得出啦。無非為錢啫。。。但係你睇唔到咩？班編輯高層，為錢去埋沒良心，最後都係畀晒律師，先換來茂少幾年。

因果報應，現在報得好快，報得超額完成。

＝＝＝

時近新春，人手短缺。公司要我加碼，二月份只放兩日假。昨日休息完，就要直踩到月尾，三月一日才有假放啦。

唔理咁多，呢幾日，買舊豬肉去拜神。假期開工，都係訓多過做。一於新春大吉啦！