充滿希望年初四

上回提到，初三要去行山。收工返抵家中，立即弄個杯麵，另煎兩隻蛋，食飽屙埋屎就出發。去到北潭涌，接駁巴士剛好到達，三扒兩撥就去到黃石碼頭。現在西貢遊人以國內人居多，唔緊要，我行條路線佢地唔會行，可以安樂地行，唔會躁狂。

行完搭車回家，途中竟然睡著了，可見呢排都幾累。回到家中，上網查一下之前買了的馬仔，挑，無影無蹤。唔緊要，星期日再博過。

上回又提到，要研究我部midi controller keyboard ，昨晚就開始進行。一深入瞭解，就發現有更基本的問題要解決，就係電腦音效的問題。於是先從根本入手。今朝收工，買隻糯米雞，食飽就開工。不過睇左兩個鐘頭，疲憊不堪，只好去眠。急不來也。

上回又提到，要買支結他。所以一訓醒，就立即出發。去到救世軍，嘩，乜咁多人？拎起支結他，咦？乜四百八咩？可能上次在櫥窗外睇唔清楚。慢慢逐樣檢查，狀態都可以。$480都合理。拎去畀錢。嘿，原來有樂悠咭可以有八五折，咁即係$408就得。真係大喜過望。

今次買結他，係因為原有的一支實在太不堪。樂器係精密的儀器，唔計音色，單係音準都唔容易做到。詳情唔講，總之舊結他係一個失敗。現在呢支，只係入門級，不過算得上合格，易彈。我都只係新手，太貴的都只係浪費。

咁支舊結他點處置呢？通常我乜都留低慢慢再算。但係今次就心狠手辣，立即掉了。

希望有呢支結他，可以真正上路啦！