天父地母年初九

昨晚和阿康談到公司的新合約方案，大家都覺得為難。講了出來，個人好似輕鬆了，再訓一覺，醒來天露紅霞，又覺得個人冇咁煩擾。

做完要做的工作，就在空地做下伸展運動。突然身後有人大喝一聲恭喜發財。原來係個司機大佬走來派利是，真係意料之外。大家互相祝賀一番。心中根本冇期望會有利是收，所以過年前，自己封了一封給自己，利利是是，圖個意頭。呢個場出入的人、有一半係南亞人，收利是的或然輪減半。一路只係去年收到一個工頭一封咁大把，後來呢個工頭和成隊車隊拉隊去左第二個場，所以今年完全冇想過利是呢樣野。平時我都係本住：我係有個知書識禮的人，見到人就打個招呼，絕冇話臨近過年就笑口噬噬講早晨去博打賞。

想下想下，又有個女子走近，我本能反應講句早晨，佢一手就從袋中抽出紅包，用普通話講新年快樂。唉！慚愧，查實我唔係好認得呢位大媽。

＝＝＝

上幾回講到，我一邊行山一邊聽跑馬，單棍位置Q過了四關，中了個四穿十一。行到去深井，呢處係潮州人地頭、所以都有盂蘭勝會。睇到告示，話正月初九係天父地母誕，有盛大慶祝儀式。

我心諗，點解我幾十歲人，都未聽過呢樣野呢？我鄉下唔興？但係心中就留下正月初九呢個印象。過了一陣，上班途中，見到有告示，係附近福德廟，話正月初九、天父地母誕，十一點半有儀式。就係咁，年初九呢個日子就刻在我心底。

＝＝＝

收左兩封利是，天色漸明，覺得世事一啖砂糖一啖屎，食完屎又可以食糖。想起呢個天父地母誕，決定收工就去參拜一下。

只係七點幾，只有幾個人。講的都係廣府話。老伯公地頭，唔係我地潮州人天下咩？鞠下躬，祈求身體健康，有飯食，有錢剩，嘉應高昇，小鳥天堂，穿甲戰鷹。。。

＝＝＝

離開之後，心中想到，人生一切，都係選擇。選對富貴，選錯就蔽翳。選擇都有細分，有選左或右，選做或唔做。點樣選，我今時今日都未有方案，但係有樣野好肯定，就係千祈唔好去問人意見。另一樣可以肯定的，就係如果個選擇，你定性為做或唔做，就一定要去做。