不安

最近天氣開始回暖，打算趁未太炎熱，去多點行山，鍛鍊下我的雙腿。上網睇了許多視頻，最想去，而我又頂得順的，係西貢千島湖，太墩。應該由北潭涌行一小時就去到，原路折返，不會太辛苦或危險。

當然又會想下我去過的地方，睇下有邊處可以再去。咁就出事了。有三個地方名，總係想不起來。

第一個係西貢萬宜水庫東壩附近一條小村，可以行去小破邊州，村屋髹成五顏六色，扮晒小鎮風情。叫乜名呢？

第二個係深井對上的一條小村，有個池塘，種滿荷花，有種世外桃源感覺。我十分喜歡呢個地方，對自己想唔起個名，十分懊惱。於是嘗試沿整條路線去想，經過甚麼地方，或者會勾起回憶。點知咁就出事。我係從大帽山坳出發沿林道大欖段行，路過。。。路過呢個地方叫乜名呢？咁，兩個變成三個。有三個地名，想極想不到。

昨晚我就不斷想，讀書考試想唔起答案是什麼滋味？大家有印象嗎？想到九點，終於想起，萬宜附近條村叫白腊灣，我嘗試捉緊那一剎的思路，到底係點樣想出來呢？但係好似只係佢自己浮出來，唔係我挖出來。咁就弊，如果人腦係咁樣運作，佢唔浮出來，我永遠想唔到，我係被動，無法可施。咁記憶埋沒就冇左，如果情況惡化，或者有一日，屙完屎點樣清潔都會唔記得。叫人感到極之不安。

想到十一點，第三個名又浮出來，係田夫仔。我係經過田夫仔，去到一個路口，一邊去青龍頭，另一邊就係去我呢個世外桃源，但係叫乜名呢？應該係三個字。。。但係就是想不起來。

休息，醒來又想。到收工，去大家樂早餐，我係手機APP提早點餐，去到就埋櫃檯取。坐低食左一啖，咦！我拎錯人地份早餐。乜我唔止記性衰退，仲濛鳩查查。

返到屋企，整頓好就走去訓。不久就起身小便，輸出途中，哎！清快塘！

我應該開心定唔開心呢？我都唔知，倒不如趁未至要入老人院，多出去四圍走走。