勵志故事

搵得一蚊得一蚊，休息日唔休息，撈多一更。今次去了個新場，原來係個蓬萊仙盤，成晚坐，官方休息時間仲有差不多四個鐘。咁樣賺錢法，真有點內疚。

到天亮，一定係清潔工最早進場。阿姐有好有唔好，不過只要你主動示好，打開話題，拳頭不打笑臉人，大家嘻嘻哈哈，工作就會輕鬆點。講開攪衛生，我話係呀！你執得企企理理，之後有手尾，咁就好易保持整潔。然後就講，我屋企就唔得勒，成個堆填區咁，已經無從入手。

阿姐問，叫你老婆執丫嘛。我話，我係獨居老人，孤獨終老架勒。阿姐唏噓地講，我咪又係。。。跟住開始想喊咁口，嚇得我死。

原來佢老公兩個月前先過身。佢日也孤清清，夜。。。也孤清清。食唔落，訓唔著。。。一路講，開始哽嚥。大佬，晨早流流唔好咁啦。問佢乜事，原來。。。佢話佢老公一路無病無痛，突然一日唔開胃，走去睇中醫，哦～～～你中招啫～～～執兩劑藥冇效，去睇西醫，哦～～～你中招啫～～～食兩日藥又無效。突然好唔舒服，去睇急症，驗出係末期癌症。乜都唔駛做，一個月就埋單。

阿姐淚水就快標出來。我立即出招。你應該開心啦，佢福氣夠，一定係幾生做好事修來呀。人地折磨幾年，家財耗盡，都係要瓜。佢而家咁樣一個月，係好事呀！你為佢開心至岩呀。

我一路擔心，最後幾年會點呢？會唔會失去自理能力，大小二便都不能處理呢？就算入住老人院，有D阿姐，剛剛換完片你又屙，你食返佢啦！

網上睇過有人講，對付癌症，你唔好割，你一攪佢，佢就攪對抗，係要擴散。你要同佢講，我地要和平共處，我唔攪你，到我命該絕時，大家一齊走啦。講得好理想，但係心諗，你搵笨柒咩～～～

也許，真係應該如此。

超人係化療期間細菌感染而過世，但係驗出癌症到過世，時間都很短。智叔過世，半年前我都在城門見佢跟發叔跑步。鄭啟泰仲爽快，兩、三日就得。之前的境況，簡直係春風得意。

咁，又要睇返身體狀況。好失禮，早一日，我一時大意，鑄成大錯，結果要由九樓，行上十六樓，再上天台，即係八層樓。係工廠大廈的樓梯，相等於住宅大廈的，冇十四層都十二層。當然面又紅，氣又喘。但係無頭暈眼花，無抽筋。咁，我身體應該仍然很好。

有排未死得。