大休

僱主相信是因為要慳長期服務金，要員工每年離職，重新簽新合約。吊佢老母，真係賤。如果唔係腳痛，我就索性搵過份工。結果，放左三日假。

星期日，收工返到屋企，好凍，天雨，訓覺。一覺睡到下午五點，起身睇電視，到十二點，又訓。

星期一，七點起床，磨下磨下，返公司簽新約。個天落雨落不停，非常凍。又係隊啤，訓覺。

星期二，四點起床。約了朋友郊遊。好凍，但係天朗氣清。九點鐘時，已開猛太陽。和朋友兩都覺得十分意外，行山行個不亦樂乎。回家沖個涼，睇陣電視，又訓。

星期三，五點幾醒。唔凍，假期完畢，今晚要返工，今朝當然唔可以浪費，一於上川龍。茶居去年十二月發生兵變，全部點心師傅跳船，都唔知變成點。上到去，有開喎。問其他熟客，原來店主一家三口自己做返。於是乎，七點鐘才有點心食，以後逢星期一休息。一場來到，照食啦。點心開籠，試下雞紮，雞中翼條骨血水鮮紅，調味明顯太重雞粉，個蒸籠殘留有鳳爪。

我聞說去年茶居生意大旺，點心師傅做到仆街，於是要求加薪，但係不得要領，憤而集體離職。其實早幾年，聽過佢地員工講，由個太子爺主理店務，但係爛賭成性，成日輸到要拖糧。班員工都肯捱義氣，照做。後來老店主交畀新抱打理店務，太子爺就訓到皇朝八晏才出來開工。以為一切可以從拾正軌，點知現在攪成咁。老店主已經乘鶴西去，以為新抱可以擔起重任，照今日感覺，應該我都唔會再去。

年紀大，經常見證興衰起落。你同後生一輩講樓市有起有跌，佢地只知最近一次跌市，點知八九六四跌過，九七跌過？英超曼聯以前獨領風騷，近幾年已經不知所謂。你又點知荷蘭朋友阿積士，德甲拜仁慕尼黑，兩支班霸，一樣跌落神壇。

變幻才是永恒～～～