後知後覺

程式問題，困擾了兩天，今朝加大力度去除錯，但係又冇出錯，真係一頭霧水。同個客講，佢話佢今日都試過冇問題。咁就千古奇案了。只能列作不了了之個案，等下有乜新發展。

其實幾十年前我就想，漁民拜天后，戲班拜華光，祈求平安，咁我應該拜乜呢？問人，有人話，電腦係新興事物，邊有神祗管架。有人話，唔理咁多，拜關帝啦！

今日，我想通了，應該拜魯班。

見過一個人，冇乜讀過書，但就負責整個系統的開發和運作。佢話，成壇野，係邊行邊砌，亂鳩咁搭棚咁搭出來的。仲唔係三行。

有時浴室外牆有水漬，師傅來到，就逐忽拆，搵下邊處滲漏。我地何嘗唔係？唔係次次都一眼睇出問題所在，要逐個單元孤立起來測試。

睇視頻有個師傅講，例如髹油，最理想梗係剷底剷到見石屎，有漏就執，然後才跣灰，髹油。但係你咁樣報價，個客唔識貨，一句人地平你好多喎，咁你只有報價份兒，永遠接唔到生意，實聽餓死。

我呢行正正就係咁。人人只見主機，唔知軟件做左幾多野，一口咬定你想搵笨。講佢又唔明，個個都話自己都識程式架，10 乜乜乜，20 物物物。我聽完唔敢笑，或者你以前真係學過，肯定你係攪唔掂，先冇做呢行囉！

或者，係因為我冇拜神，所以撈唔掂。不過唔緊要啦，我而家得閒諗下今晚煮乜送好過啦！