遊盪

今朝想起清快塘呢個地名之後，都睡意全消，記得文化博物館有展覽，欣然起行。

係一個叫任哲的人，為金庸小說中人物做雕塑的展覽。

今日陽光普照，濕度不高，走在城門河邊，十分之爽。

一入門口，就有一個像，睇來睇去都唔知係乜柒人物。睇介紹文字，先知係張無忌。哦！腳踏太極，仲唔係佢。爛身爛勢，我仲以為係乞兒。

睇左一輪，覺得條友風格似馬榮成漫畫中人物，又似死亡筆記中的死神。我藝術修養係零，唔識欣賞。

睇左一輪，開始肚餓，不如去車公廟，然後食飯。今年新年要開工，冇拜過神。有心唔怕遲，趁今日春分，補返數啦！

氣溫剛剛好，行得好舒服。拜完車公，食完飯，就出黃大仙，一到車站就有車到，清風送爽，好快就到。兩間廟有個共通點，多國內同胞。

其實旨在讓腦袋接收多點信息，唔好咁快老退，兜完大圈就回家。時間尚早，就拎大袋衣物去自助洗衣店清洗。不用輪候太久，好快攪定。

回家休息一陣，又要上班。此時覺得四肢輕快，無比舒服。可能係今日天氣乾燥，行走得多，驅走了體內的濕氣。

以後都要多些走動，活動活動呢副老骨頭。