適者生存

煙草稅又加，現在一包煙，貴過一包八公斤金象米。對我來講，就算未加價，我都食唔起，但係早上戒煙，掉晒所有煙灰盅和火機，下午就投降，重新買過；下午戒煙仲弊，半夜要去買返晒。

除了生理上成癮，其實心理上的魔呪更利害。最實在的證明，就係搭長途飛機，廿個鐘，你知道唔可以抽煙，就完全冇想過吸煙。但係一落機，就在機場搵吸煙區，試過在南韓個吸煙房係玻璃牆的，望入去成個毒氣室咁，見煙霧唔見人，都要冒死衝入去。我係守規矩的人，呢個規範會壓抑了吸煙的吸引力。但係你加稅呢？我寧願唔食飯。。。

至於點解要吸煙，我估係對生活的無奈，失望，憤怒。。。各種不滿，要搵個逃避的方法。

我有個朋友，佢吸煙比我早。但係佢就有種種規範，開頭老婆唔准食，後來個女長大，權威比老母加老婆更大，更加唔可以被佢知。例如約出來晚飯，早段佢就抽，但到後段就收停，怕有煙味被大小老虎察覺。我就冇皇管，所以漸漸的，我的煙癮就比佢大。但係吹撚漲，佢成日話要戒煙，我話：挑！你都冇煙癮，戒乜撚。佢話：其實係有架，每當乜乜物物，就想食煙。我話：你同我講呢D？

佢所講的，我通通都知，知得比佢深和廣。面對不想面對的事想抽煙，做完勉為其難的事想抽煙，屙屎要抽煙，飲酒要抽煙、食完飯，飽飽滯滯，最好抽根煙。。。。

做看更阿伯，大部份時間守在大門口。無論係開車或步行入場的，都係擔住口煙，憑煙仔的長度，就知係入場前剛點起。離開的都一樣，開車的，一坐上司機位，係點煙先，才撻匙開車。背後原因，大家自己揣摩。

我和呢個朋友，有一個共同朋友，大家係中一開始就認識。我倆都認為，呢條友，除左變成地中海，只要佢一戴帽，一笑起來，根本就和中學時期一樣。我成日都話，將來一定係同儕中最長命一個，冇之一。不過，我倆都承認，呢條友仔有點與眾不同，例如佢想法好奇特，大家對話，佢的反應係出乎意料，令你根本唔曉得如何接下去。由於畢業後各自生活，或者佢的進食習慣異於常人，令佢有呢個超人體質和性格，我地都無法得知原因。但係，我觀察到一樣野，佢對一九年的瘋狂，和之後三年疫情的困苦，根本係免疫。

反觀自己，在這數年中，內心波濤洶湧，種種負面情緒無路可訴，咁咪仆街囉，抑鬱咯，抵撚死咯。

一有不滿就點煙，見到班仆街發神經我又點煙，咁咪愈食愈大囉。

我唔知地中海朋友係咪大智若愚，可能佢係一早看透世情，好似濟公咁裝瘋扮傻，還是真係咁奇特的思想，總之，佢先至適合在這個世界生存。