朋友怎麼揀？

家人冇得揀，你要認命，接受。真係唔撚掂，就避，天各一方，老死不相往還。同事都冇得揀，除非你係老闆，全部員工由你去揀。至於朋友呢，大撚鑊啦，你自己負全責喇。

＝＝＝

忽然想起放生佬，都好耐冇消息。

當初係一個客介紹，幫佢寫個程式。當年佢仲係風生水起，在大公司任銷售經理，第一次見面，佢問我在哪，就開車來和我飲茶傾。我先到酒樓，開了位就通知佢檯號。我見到有條友進場，地中海，金絲眼鏡，標准生意佬形象。走去前三排張檯，和坐著飲茶的人對話。我諗，唔係佢卦？我畀埋檯號佢，咁都搵錯？

點知真係佢。咁我都唔會歧視人既。佢一開口，中年好聲音，佢偏高音，唔係海豚音，得罪講句，係太監音。咁我做生意啫，你唔係要我殺人越貨、走私犯法，岩價錢咪做囉。。。

一路正正常常地合作，我交貨，佢驗收，滿意畀錢。下次有野要改，又再傾，重複重複又重複。

有時佢叫我去九龍灣近佢公司地頭。去到發現要等位，就突然有個女子跳出來，唔好意思呀老細，遲左卜位、要你等。

又有時去到遠至大埔，佢開車而至，跳上車，就唔知去邊處飲茶。

次次都係個程式有改動。而且我觀察到，多數係年頭發生。

後來。。。各位看官，都知佢最後消息，係揸的士啦。即係中間經歷過事業下墮啦。據我所知，期間佢老婆要求離婚。。。

但係差不多每年，農曆年過後冇耐，佢都會搵我飲茶。一坐低，就搬出手提電腦，提出改動方案。

有生意我當然做，但係，我覺得咁樣細眉細眼去改，我都冇癮。每次都叫你是但隨緣樂助啦，因為真係唔知點計佢錢、佢就兩千、三千咁過數，我都不以為意。

咁樣來往都十幾年之久。有時出到來，佢一坐低，就搬晒電腦，電話。。。佢仲有一部老年的PALM。。。自顧自的大攪一輪，我都不以為意，其實我覺得係好冇禮貌，但係我當左佢係朋友，就忍奈下。

到前年，新冠疫情高峰，佢又搵我，我表明我冇打針，要出來，只有買兩個飯盒上大帽山坐低傾，佢都應承。開的士車我上山頂。又係提出要改動個程式。我話我得了抑鬱症，連刷牙沖涼都成問題，點去幫你改程式？

但係隔冇耐，佢又約我去川龍飲茶。我話我冇打針，入唔到去架。佢好似充耳不聞，幾時幾點，我開的士來接你。我照去，上到去，佢一心就要坐入去店內，我話坐外出啦，我冇打針，有事我就走落西洋菜田，逃之夭夭，免得被罰五千，又累店家停業。佢先肯坐外圍。

最後我完成左佢要求，連原碼都交過佢，話我自認入錯行，呢單係最後，以後都唔再做勒。佢都爽快過數。但係之後，就再冇聯絡。

之後聖誕新年，我都WHATSAPP佢，佢都有回應。但一年，兩年，我唔記得左。佢就冇影冇蹤。

冇影冇蹤，可能係佢根本唔當我係朋友，只當我有利用價值時，就來穫利。甚至，當係新年做下善事，益下我呢個窮到窿的人，或者當我係一條死魚，將我放生，先至無中生有的要求我改動下個程式。即係有些流年運程書講，新年要去洗牙，應左血光之災呀！咁～～～

＝＝＝

朋友唔駛揀架，唔係真朋友，到你冇利用價值，佢就。。。想搵都搵佢唔到架啦。