齆塞（盟塞）

某年某月某天，我要去馬鞍山某處，我以為搭43X係最方便。但有人同我講，你在城隧轉40X最快捷。我諗，但係要轉車喎。不過查過路線圖之後，發覺又真係快靚正。之後就咁樣走法。

早前我建議個妹仔一條搭車路線，講到牙血都出，都唔知佢明唔明。最近又發生類似事件，對方係六十幾的大叔。證明齆塞係冇年齡之分。

對方認知範圍內，冇呢件事存在，你係冇辦法講得佢明的。你認為你在幫忙，但你又點知對方是否需要你幫忙呢？往壞處想，萬一佢發現自己真係笨實左，而你就係唯一知道佢笨實的人，要殺人滅口，咁咪仆街？

所以，俗語說，各家自掃門前雪，理柒他人瓦上霜，真係大智大慧。

於是，我就回想以前遇到過的齆塞事件簿，重新思考如何應對。

有次有個台山婆話，搵唔到乜乜銀行。我咪話佢聽在乜乜商場，乜乜。。。點知佢就一輪嘴，好勞氣咁話，搵過啦！都冇。。。我再想開口，佢又一輪嘴。。。

現在想來，佢只係想發洩情緒，到底搵唔搵到都唔重要。

我應該附和佢，係啦！開銀行開得咁鬼鼠，都唔知係咪暗地裏賣白粉既。

咁，我就唔駛勞氣。對方或者當我黐鳩線，但係我開心喎！