重疊興奮

很多年前，簡蛇旗下有匹馬叫重疊興奮，覺得改得幾好。因為要興奮都難，仲要打孖上，係多麼多麼的難。

今日，收工後走去洗衫。難得自助洗衣店有空機，唔駛等，唔駛勞嘈，已經開心地開始一天。

之後稍休一下就走去訓。嘩，一覺訓到五點半，幾難得呀！呢個杞菊地黃丸，真係老男人救星。又唔貴，計返一日只係十蚊，你話開心唔開心。

呢個鐘數才醒，唔駛諗，晚餐都係兩送飯啦！沖茶飲，然後梳洗，出發上班。打開信箱，有信喎，係税局寄來的。等你等到頸都長。學黃興桂講波，封信一係好野，一係衰野。

話說敝公司要摺埋，去年九月十八日，就向稅局入紙，求佢放行。到今年一月，佢先來信要我遞交財務報告，攪一大爛餐，先搵齊文件送上。期間日日打開信箱，內裏得一片迷惘。到今日，才有信到。

急急拆開，唉！皇恩浩蕩，終於放行。七個月，可以行下一步了。刁完稅局，再刁公司注冊處，又要等幾個月。總之，甩左呢壇野，有個了結，將一個階段了結，始終係好事。