靠得住

今時今日，每個人都有唔少物品需要充電，手機，平板，手錶，飛機，大炮。。。現在多數都係用USB Type C線來充電，所以每買一件就跟一條，整整下，屋企就有一堆線。看似條條一樣，其實係有分別的。有d線，只能充電，不能傳送數據，你想抄手機內相片落電腦，用錯線就頭都大都抄唔到。

就算充電，都有功率之分，某些線不支援快充的。

當然，仲有質量問題，水皮的線，用久了，內裏有破損，外面看不出，咁就叉極叉唔完。最近就係遇到了呢個問題了。要去買條好線勒。

上網查一下，嘩，百幾，二百蚊一條都有，佢就話點好質量，我鳩知真定假咩。

之前淘寶買過一條，外表就好勁，但用得一個月，就唔掂勒，把幾火剪開一截截掉左佢。

靜心再想，咦？姨媽傢私賣呢類野，都靠得住喎，好似個火牛，就用左好多年，冇火燭丫。上網一查，一條只賣卅九，買返來試用，充電快傳輸快，包皮穩陣，應該有排用。打算買多條添。

事後檢討，幸好有些牌子係靠得住，咁就買得安心。當然，有時要有痛苦的學習過程。例如，試過貪平，買了特福的電飯煲，冇耐個煲底就花晒，不久後仲壞埋，終於都係要買個樂聲。電水煲，氣炸煱唔好買美的，一陣膠味，食壞人架，買飛利浦啦！

當然，又要有識貨之人，遇過一個大媽，佢話美的係大牌子，好野來。講多無謂，你買飽佢啦！