六合彩狂想曲

今日臨近開工時間，有個同事仍未出現。有人就話，唔通昨晚中了六合彩？

中左都未咁快收錢啦！

你冇睇周星馳電影咩，未收錢就要出去威架啦！

要辦工時間登記喎

用投注戶口的話，就直接過戶架。但係每日提款限額卅萬。

每日去提卅萬都幾過癮喎

唔好提出來，要洗幾多攞幾多。然後申請公屋。咁就人生勝利組勒。

。。。

大家有呢段對話，因為呢個場，有一段詭異的歷史。大家都冇講出口，但係每個人的想法應該會一樣。幾個月前，有個同事辭職，而且係賠錢即走。又唔係有爭執，乜事都冇。如果有高就，除非係有九倍人工，否則點會賠錢走？

大家冇講出口，但都認為佢係中左六合彩，靜雞雞，一走了之。

===

中六合彩的機會，細到唔知點形容。但係又有人中喎。

當然有D人會用陰謀論去解讀，拿拿拿，次次金多寶前都連續幾期都冇人中頭獎，一定係任佢操控啦。

我話，咁你咪唔好買囉！冇人用槍指住你要你買架。佢又會話，中個二獎都好呃。

又見過有D仆街，怕其他人中左，就四圍搵人所謂結盟，誰中頭獎，就贊助另一方去讀書。

又見過扮大方慷慨的，誇口如果中左，就分一半過我。我心諗，如果我中左，我搵人打跛你對腳。

===

有一個大公司高層，訴說有D員工，連份內工作都要踢一踢先郁一郁。吊你老母，你咪返屋企等中六合彩囉！

意指你一世都冇出息，永遠在最底層。

===

想呀想，想到某些關於六合彩的往事，真係想到心痛。算了算了，我要眠了。