邊個話我傻

話說，我樓下間衣紙舖的貓店長，死鬼肥貓，已經走左好多年，後來個舖位轉手，輾轉最近變成一間髮形屋。捲閘變成玻璃牆和門。我發現，髮形屋有隻貓。佢好喜歡訓在玻璃牆邊，每朝經過，我就敲下玻璃，佢被吵醒，唔會發火，反而向我抛生藕。我懷疑係肥貓托世再來找我。

我睇下個貓樣，點解兩耳尖有執毛咁得意呢？咁鬼招積？如是者日日經過，我都會和咪咪互動下。突然有一日，貓耳上執毛冇左。心諗，唔通個飛髮佬得閒冇事做，剪左佢執毛？　

再研究多幾日，原來呀。。。呢間舖頭係有兩隻貓，毛色一樣。一隻係陀地，耳尖冇毛。另一隻係緬因貓，有執毛。

我真係老到懵Ｘ查查。笑左一大餐。

＝＝＝

今朝落街，迎面來了一個肥婆。一邊行一邊趙香口膠。睇真Ｄ，唔係香口膠，原來係吹波糖。個肥口咬下咬下就想吹波，一吹就成舊膠飛左出來。佢又身手靈活喎，一手接住，又塞返入口再趙過。我笑到要烏低身扮縛鞋帶。

＝＝＝

我就係咁，生活中的小事，覺得好笑就笑，同身邊人分享。但係人地唔覺得有趣，只覺得我笨，咁就以為可以搵我笨。大陸陳係咁，洗衣佬又係咁。洗衣佬仲蠢到，我同大陸陳反面之後，用返大陸陳條笨橋來搵我笨。

世人以為搵到人笨，就係精明。我就一早看通，機深禍更深呀。我冇睇過紅樓夢，但係都知道，王熙鳳機關算盡太聰明，結果算去了自己的命。

＝＝＝

上世紀九十年代，試過和一個中學同學合租一個單位。條友以為我可以被搵笨，就扮晒公子少爺，乜都唔做。打掃清潔一切都要我做晒。我睇清條友，就同佢反面。

結果以後都不相往還。十幾年後，佢已經結婚，當然冇請我去飲啦。某日在街上遇上，大家打個照面，我打算埋去打個招呼，點知佢急急拉住佢老婆就掉頭走。

其實我想話佢知，當年，我曾經將佢支牙擦浸入屎坑中。