相當刺激

星期日朝收工，一時興起，走去食粥。叫個白粥，炒米，和蘿蔔糕，食得好開心，畀錢就唔開心，每樣各十三元，合共卅九。食粥水都要卅九蚊，生活難呀。

返到屋企就訓。訓醒時，十二點半。行行企企，又到跑馬時間。我收到堅料，話潘頓和布文呢兩個騎師眉來眼去，一個大熱門，第二個就博殺，大熱門倒灶，咁就肥仔啦。又有消息話，澳洲佬隻手遮天，練馬師都要買澳洲幫。於是乎，第一場騎師就買左潘頓，艾道拿，因為練馬師就係希斯和蔡約翰。

一開閘呀！唔知點樣，潘頓就放左出頭，大佬，你放頭唔係好掂喎，搵咁野搞？艾道拿都守住好位。係咁維持到入直路，潘頓帶出兩個馬位，艾道拿都逐步推進。心諗十拿九穩啦。點知去到最後一百米，風起雲湧，一堆馬殺上來，我大叫：頂住呀！

去到最後八十，霍宏聲呢個南非仔出頭，艾道拿追到好貼。潘頓呢？好似腳軟咁，另外仲有兩匹馬殺上。吊你老母，潘頓頂住呀！頂！頂！頂！

過終點，霍宏聲第一，艾道拿就第二。潘頓個第三位好似被潘明輝追過喎。吊你丫！慢鏡重播，一，二，三，咦！好似有價講喎！潘頓，你老母化，頂住呀！

要映相。映映映。。。終於潘頓頂到！第三！只係贏一片剪指甲彈出來咁少。有錢收！

嘩！振臂高呼！我估左鄰右里都以為攪出人命！

好耐冇試過咁緊張刺激。結果，錢就唔係贏好多，但係咁驚險過程，贏得到，真係開心。

結果，成日亢奮到，要到半夜兩點先訓得著。