獅子山下

人生中有歡喜，難免亦常有淚。

＝＝＝

先講唔開心的。昨日要過九龍灣辦事，就順便去牛頭角飛髮。我最驚的事發生左，就係冇開門。我兩點鐘去到，見拉左閘，個心十五十六，我有大頭文的電話，但係唔敢打。本來可以過隔籬舖打聽下，但係唔敢問。咁我先去九龍灣辦事先啦。辦完事，行返轉頭，成三點鐘，仍然冇開。

上世紀９６年回流香港，基本上係每次理髮都搵唔同師傅去試。當時我住過深水埗、西營盤、馬鞍山、官塘，試極都唔滿意。最仆街一個飛髮佬，一邊剪一邊昅女，每次有人行過門口，佢就擰轉個死人頭去昅，仲割傷我耳仔。吊佢老母！

９９年，住官塘，在九龍灣工作，有次遊下遊下，去到牛頭角下邨，當時都未重建。環境係點，年長一輩都知，見到有間髮廊，唔知何來勇氣，走左入去。只見幾條友圍埋操啤，見我入來，一個大媽放低啤牌，捉我去洗頭。大媽手指甲好長，好用力咁刮我頭皮，我不止一次叫佢唔好咁大力，好痛呀！洗完頭埋位，就有個肥佬埋來剪髮，呢個就係大頭文。話佢肥都未太肥，係圓嘟嘟啦。鬍鬚根突晒出來咁，睇落唔係好開胃。但係唔講得笑，剪完我就知道找了幾年，終於找到了。點解叫佢大頭文？因為飛髮時，只係從鏡中睇到佢，佢生得唔高，只係見到佢個頭，而且真係幾大個頭。

後來牛下清拆，佢搬到現址，我都搬了入荃灣，但係都千山萬水去搵佢飛髮。大家傾下傾下，我就當左佢係我心理輔導員。我老豆老人痴呆，佢都知，佢會記得，問我近況。到老豆去世，苦無傾訴對象，我都係去搵佢傾。２０年被個仆街客放我飛機，累到我雞毛鴨血，搵佢訴苦。２２年抑鬱成病，都係去搵佢開解。

實在不忍，萬一知道佢真係有病，都唔知點算。所以有電話都唔敢打。我試下過幾日再去，睇下點啦。

＝＝＝

曾提到，我樓下肥貓舖頭，現在變身成一間髮型屋，養有兩隻貓。每朝經過，我都去玩貓。兩隻貓漫漫長夜，就打打殺殺，每朝都見到一地都係毛巾紙巾。隻唐貓就好高竇，唔理我。但係隻緬因貓，就人盡可貓。佢一見到我，就飛奔到門口，在玻璃門縫聞我手指。有時我將一張紙幣攝入去，佢就用手去抓。每日如是，我估佢已經認得我呢個傻佬。

＝＝＝

樓下間便利店，都係我常幫襯的。大媽服務員，得閒就吹兩嘴，所以乜鬼膠袋一蚊收費，都唔關我事，要袋就要袋，唔駛錢。最近來了一個後生少女服務員，哇哇不得了。我第一眼見佢，總覺得佢似某某某。想了很久、才醒起，係好似年輕的商天娥。最不得了係佢臉蛋，不施脂粉，都白裡透紅，乜鬼彈指欲破，原來現實中真係有喎。

大家不要想得太多，我一把年紀，好命的話，個孫女都咁大啦。只係見到，讚嘆一下人世間竟有如此標緻的人啫。

近年遇到的年輕人，都係不堪到無倫。待人接物，都費撚事教精佢。但係呢個妹妹，笑容可躹，有傾有講。一百分滿分，要畀夠百二分。

＝＝＝

起承轉合，又講返飛髮。如果真係。。。我唯有搵食神老豆幫手。佢話佢幫食神剪毛個電鏟，亦都係用來自己剪髮。咁不如幫我剪埋啦。