夜涼如水

星期日本來休息，為搵多個錢踩多一更。星期六，日都係悠悠閒閒，所以非常樂意。半夜醒來，望向天空，冇早前的寒風刺骨，覺得心境寧靜，難得的平安。

印度人講地，水，火，風，空。其中的空，係空間的空。有個阿差話應該早晚一次，抬頭向天，感謝呢個空。因為宇宙中星星月亮太陽，能夠和諧運作，背後的力量極之偉大，集全宇宙間生物的力量，都冇辦法做到。可知一個人係幾渺小，要認屎認屁，乜都認叻的人，都懶得笑佢。

原本係星期一大清早就去洗衫，要開工就改下午去。亦因此每星期一的行山活動取消了。本來想星期二一早收工去，但係呢排睡眠品質不好，多夢易醒，聞說係陰虛血少，要食天王補心丹。未買到藥就唯有買埋早餐返屋企，食完就眠。

途中見到有間叫做遇見小麵，早餐糯米雞煎蛋餐肉豆漿只賣廿八蚊，咁平？就試下佢。點解冇收銀處？大鄉里，原來係掃碼點餐，再網上付款，咁就會有人送餐勒。再過幾年，人老到濛鳩查查，再出新花款，就有錢都冇飯食咯。樓面只得三個年輕女子，捧餐，執枱和補充食具，如果用埋送餐機械人，老一脫的侍應就冇得撈了。

唔想咁多了，有答案咩？食完覺得有滿足感就好了。返屋企就眠，又係多夢，兩個鐘就醒。心血來潮，去買魚做午餐。行了一圈，花多眼亂難下決定。最主要係一條友難選擇。最後買件鯇魚腩來蒸，用豆乾墊底。

肥美的魚油，令人有豐足，幸福感。呢餐實在飽，晚餐可能食唔落。稍稍休息，又走去眠，入睡冇難度，但又係有夢，不足兩小時就醒。個人都精神既，坐下又攪晚餐。一早就準備好雞腿，用埋雪櫃中的半個洋蔥和薯仔，整咖哩雞，留一半明日食，今晚食一半。

無錯，現在最關心的就係食。不過我都有改進自己。現在已經養成了食完即洗的習慣，除了時間緊迫，都會洗好碗筷，煲煲鑊鑊。見到個星盤冇堆積，個人都安樂的。

另一個項目係練習結他。一路以來，最大阻礙係唔協調。網上睇到一個方法，去練習兩手的協調性，試了幾天後，覺得有幫助，點知呢個時候就斷左條弦。冇計，條命生成係咁。得閒經過通利就買返啦。

希望今晚睡得好，明早上城門。