之後聯想到很多很多。
===
有人話西方國家福利好，有社會保障，老來有尊嚴，點都餓你唔死。但係國家窮起上來，又要推遲領取福利的年齡，又要減呢樣減果樣，仲成日宣傳一樣野：到十年後，人口老化，到時就仆街啦，一個後生仔，要養九個老人家。你打工納稅，去晒畀老人家福利。講成老人家係負累，甚至係剝削後生仔。
我講一樣幾十年前，睇林行止的專欄講的事。政府起地鐵呢類基建，全部都係貸款，仲係幾十年期的。就算庫房大撚把錢，都唔會一炮過畀晒。因為地鐵系統用一百幾十年，應該有份用的人，就出返一份錢去支付，即係用日常營運收入，去支付貸款的本金和利息。所以，七十年代起地鐵，到現在可以起觀塘延線，可以再起新路線，全因呢幾十年，眾多乘客為當年的貸款找晒數。咁，現在的後生仔，話老人家畀兩蚊就可以搭車，霸晒座位，阻撚住晒，唔見你早D死！前人種樹，後人乘涼，種樹條老坑，坐過來乘涼，就被你屌，呢種叫乜呢？你話長車短搭，香港天氣咁熱，企響街多一陣都暈，咁樣都唔能夠包容，係一個乜野社會了。
中國人社會，向來社會保障少，靠的是人倫親情。家人有難，幫得就幫。就係用呢個倫理關係來提供保障，從而維此社會、國家穩定。所以美國佬就來宣揚老人家剝削後生仔的理論，要破壞你的社會穩定。
＝＝＝
有新聞話馬斯克上任DOGE後，NED和美國之音被關水喉，似要倒閉。呢兩個一直暗地推動顏色革命的機構玩完，係咪就天下太平？一定唔係。美國會唔會出手救黎智英？一定唔會。因為已經睇到，另一股洗腦力量在形成，黎智英的任務，已經有人接手。
早前元朗暴動案審結。就有網上媒體，報導一個犯人的訪問。條友當時係投資銀行副總裁，年入以百萬計。一夜之後就失業，抑鬱呀，仆街呀！經歷咁多年，終於審訊完畢，被判入獄。又係一向套路啦，我係受害者呀！我大好前程，被人陷害呀！而家乜撚都冇啦。以後坐完出來，叫我點算呀？
大佬！你做過乜？你開消防喉射水呀！消防喉點樣開，我估唔係好多人知。絕對唔係一個唔小心就開左，一個唔小心你就拎起條喉，一個唔小心就射親人架。你係要用個鎚打爛玻璃，撳著火警鐘，先會有水出架。條水喉有後撞力架，唔係咁易操控架。你仲唔係積極參與暴動？
＝＝＝
呢種語調係咪似曾相識？一九年七月一日，一班暴徒打爛立法會的大門，闖入大肆破壞，後來要幾多人力物力來修復？當時就有新聞報導，大樓內的汽水售賣機被破壞，汽水被取去，但係有放低錢。意指呢班破壞汽水機的，係守法的人，間接指成班暴徒都係守法之人。我當年就話：你拎過汽水的出來，我請你飲一世汽水。打爛汽水機，算！你破壞社會安寧，你坐完監我請你飲一世汽水。而家唔係追究你偷汽水呀，明唔明呀？白痴！
聞說秦檜係有才學之人，但係有才學唔代表有良知。就係有一大班識寫字，但係唔識分黑白是非，見錢開眼，用佢支筆來破壞社會。咁審黎案都講左、係乜野人寫呢D報導、係邊個指示和指使啦。而家黎智英都坐左咁耐監，報紙都摺左咁多年，但係又有一批人出來，做同樣的事。證明條水喉仍在，又搵返一班人出來攪洗腦。
仍然在破壞。
＝＝＝
有個台灣人，叫王大陸，犯左事。立即就有人話：個名已經顯示一切啦。可見一班人個腦已經壞左，救唔返。人地就係不停地在灌輸歪理，洗腦，所以，唔能夠放鬆，自家傳統思想，好的要珍惜保留。
不過，對一班笨實，講多都嘥鳩氣。倒不如讚一讚餃子導演，做得好。
沒有留言:
發佈留言