我就唔係住公屋，呢類新聞，望完標題就算、唔會深究。但都留意到，網上連登友講，新政策一出，就辭職唔撈，零收入，咁就幫左個家、唔駛交貴租。
昨晚星期一上班，見到蓮姐，佢立即捉住我，問我呢個政策有冇影響，我話暫時冇既。佢一輪嘴講講講，我就係係係。冇計啦，風頭火勢，佢嬲到屎都滾，要搵人發洩。
佢係單親母親，同個仔住公屋，個仔出左身，返緊工，力爭上游，咁好合邏輯就會一路加薪。咁佢地如果一切唔變，就會一路加租，甚至被迫遷。現在只有一條路，就係會仔搬出去，除名，剩返個老母住。
阿蓮仲話，我個仔搬出去，你估佢有錢買樓咩？有錢租私樓咩？咪又係去租劏房，到時劏房有價有市，一定加租，你都仆街架。大佬，我一早都知啦。但係咁勞嘈，人地班柒頭官會理你咩？人地做完個任期，等擺荷蘭水蓋，又富又貴呀，班富貴。
＝＝＝
其實我早前就想發作。一班官，攪乜撚簡樸房，真係掩耳盜鈴，扮工而唔係辦工。劏房本身有乜問題？市場力量會調節。先天性失衡先係問題。你班柒官話劏房居住環境惡劣，唔住得人，呢個只係其中一個問題。你搵到有劏房個案，張床就放在馬桶傍，一家三口，咁樣都係人住？係呀！咁點解有人肯住？
喂！如果呢個房月租六百港元，我都去住呀。但係幾錢租呢？點解仲會有人租？
＝＝＝
差不多十年前，我都講過，粗口成話工廈劏房好呀，屋宇署一來查封，就可以上樓。於是佢就租左工廈劏房，五千六一個月，連窗都冇，係十年前呀。我在公園撞到佢，佢話好耐冇見過陽光，所以出來曬下。後來再見，佢話真係被屋宇署抄家。我話：恭喜你囉，上樓囉，擺兩圍賀一賀佢啦。潤到佢黑口黑面。其實佢要搬去另一劏房。
＝＝＝
住屋問題，係因為唔知點解，貴到無倫，先會有劏房出現。最初係叫做套房。喂！你個睡房有跟個廁所，係套房呀！然後一路繼續惡化，劏房呎價貴似豪宅。然後就出現劣質劏房，要在屎坑隔籬食飯。一沖廁就屎沫橫飛，食飯要撈屎水。
呢班廢官話，我地要做野呀！要取締劣質劏房，監管住佢，要有一定水平，變成簡樸房啦。我地咁就解決問題勒！
人人都知，隨後的劏房租金，一定會更貴。
現在加埋公屋政策，就貴上加貴。一定民不聊生。
等爆大鑊啦。
沒有留言:
發佈留言