星期六晚返工，都知道半夜就會掛八號波波，咁咪好囉，個場冇交收，靜過自修室，未到十點，我就眠了。到點幾鐘醒一轉，冇乜動靜，又再眠。到五點幾醒，都唔大風，冇乜雨。見到巴基之星，大家呵呵呵，冇風喎。
到六點後，就起風了。勢凶夾狼。阿頭六點九就叫我收工，早早回家。天文台響左七點廿分就掛九號，咁我諗住仲有港鐵搭，就向車站進發，點知去到，嘿！閂門喎，叫大家離開車站喎。
咁唯有就行路回家啦。車站對面有間唐記，竟然有點心食，拿拿聲買兩個菜肉包，食飽先上路。然後就踏上我漫長歸家之路。其實最主要，係一段青山公路。一定唔會有招牌跌落扑穿我個頭。不過路途都好長，風雨之中，都幾難行。不過，我就覺得好爽。成條路得我一個人，車都少，不知幾逍遙。
再想，呢排死得人多，想到大頭文，我行呢段路，又比佢化療算係乜呢？一場朋友，以後行每一段路，有你有我，在心中。
又想，太監陳臨死前日日想住自己死梗啦、死梗啦。我風中趕路，真係濕濕碎。太監陳，你死梗呀！小人冤枉作小人，一世人冇樣叻、只識擦鞋邀功，見人有好路就潑冷水。你死梗呀！
所以全程愈行愈輕快，回到家中，都耗時個半鐘。以前會覺得，點解咁對我，港鐵站未掛九號就收檔，我做錯乜？但係今次，我好輕鬆，平日行山有功，風雨中趕路，絕無問題。
我知道七仔九號波就收皮，但OK就十號都唔收，先去買啤酒先回家。返到去，沖個熱水涼，不知幾爽。隊下啤，到咁上下，就攪午餐。我早一日就知有料到，所以買定罐頭。到中午十號波，整個回鍋肉罐頭做送，極有幼年時風味。
之後就眠呀眠呀眠。中途醒來，上網睇下，已經八號，開電視睇下，吊！乜都冇？一定係天台條魚骨天線打風之下有問題。挑，咪唔睇囉。落街又買啤酒，隊完又眠，醒來好似半夜十二點，再眠。再醒來，已經係五點。乜波都落晒，就拎衫去自助洗衣。期間去左早茶，又四圍睇下，哦，附近間中學有棵大樹連根拔起喎、咁都幾大風喎。
洗完衫，就上城門行引水道，沿路都好正常，和行山友吹下水，到尾段又落起大雨。落返山，返屋企。上天台睇下到底乜事，原來條同軸線甩左。等天氣穩定先攪啦。
星期一晚如常開工，都冇特別。除左日更有個老野打風時跌親，工傷，返唔到工，其餘一切正常。
星期二，日間冇雨，上天台攪定條天線，又有電視睇了。
至此，一切回復正常。
星期三朝早，清潔阿姐上班，打個招呼。佢苦口苦面咁講早晨。唉！早前聽聞佢老公入左醫院，冇返幾日，佢前日又冇返，唔通？都係唔好多事。
收工返到屋企，又上網睇YOUTUBE，阿泰山一輪冇出片，原來又出事。
希望佢可以完全康復啦。
跟住就做個早餐，家中有排骨，金菇，就做左個金菇豉汁排骨蒸飯，食完，寫埋呢篇野，叔叔要去眠啦。
沒有留言:
發佈留言