包皮問題

最近好多飲食集團或個體食肆倒閉，多到無日無之。網上就有好多視頻，標題就話乜乜背後原因。好似大把內幕消息咁。睇完咪又係覺得被騙囉。

有人賴舖租貴，咁做地產代理生意，住香港幾十年，講廣府話都講唔正的一條友，噬起棚牙話唔關事，市場係會有調節的。咁亦都係有自己舖，都寧願唔做，摺埋佢，等收租。咁即係又唔關舖租事喎。

有人話係北上消費，咁週末上大陸，平日唔駛食飯？

有人話係兩送飯搶晒生意，我見到連鎖快餐、酒樓都做埋兩送飯架。大集團快餐話每間舖每月只賺三萬，酒樓繼續倒閉。

有人話：係以前飲食業一種作風，就係做起一間，就拿拿聲開多幾間去掠水，但係規模一大，又控制唔到盤數，咁就一鑊炒起。

我好老實，我無結論。可能係咁多因素，加加埋埋，先係死因。我知撚咩？！

＝＝＝

我只可以代表我自己。我現在大部份時間都係自己煮食，只得一個原因，條氣唔順。

我係一個窮L，但係我都好懶，如果唔係條氣唔順，我都懶得煮，咪走去食個廿八蚊既兩送飯囉。

＝＝＝

以前做生意，有次個客話要砌部機，叫我報價。我話我冇做呢樣野喎。佢硬係要我報。咁我本住唔得失個客，咪報囉。結果佢拎住個報價單來同我講：喂！駛唔駛咁多錢呀？個CPU，咪咁多錢，硬盤，咁多，乜乜，咁多，物物咁多。。。加加埋埋，頂多咪咁多！我話：好呀！呢個價，我買，你幫我砌十部！然後吊佢老母！以後啋佢都傻。

好似我今朝早餐走去食碗雲吞麵，我夠知點做咯。唔通我自己去熬個大地魚湯底，自己剝蝦，啄豬肉來包雲吞，自己用竹昇壓麵咩。人地賣廿六蚊咋。唔通我同老闆講：你材料加加埋埋，都唔夠十蚊，點可以收我廿六蚊呀？

＝＝＝

但係而家，去大家樂睇睇，去同集團的一粥麵睇睇，一個冬瓜枝竹炆排骨，韭黃蝦仁炒蛋，賣六、七十蚊。我真係十蚊可以輕易做出來，而且一定比佢用料更佳，更衛生。碗飯用米更靚。咁我就冇理由去幫襯佢。注意，係輕易就做出來，咁我做乜要貼錢受難呢？

間中都會和朋友去大牌檔隊下啤，抽下煙，食兩個小菜。每次菜到，我都望一望先。朋友問我做乜？我話：想研究下點煮啫。其實心底裏就在盤算，我做唔做得出呢碟菜。為免掃興，就唔講真話啫。老實講，大部份菜色我都做得出，而且一定比呢間店好。

唔係為了老友相聚，把酒談歡，何苦要付咁多錢呢？

又諗，如果我唔係咁窮，有個蝸居，可以容下一張檯幾張櫈，不如我買定啤酒，我炒幾個送請大家食，我仲食得開心。

＝＝＝

最近李純恩在專欄內講，內地烤鴨，一般付上的包皮，都係用預製品，食落去不知所謂。包皮累左隻鴨。

我就冇佢咁刁鑽，但係我睇現在香港的片皮鴨，都好似煙鴨胸咁，以後都唔會去食架勒。